ອົງການອະນາໄມໂລກ ຖະແຫລງພົບຫລັກຖານບົ່ງຊີ້ ເຖິງຄວາມພະຍາຍາມຈັດການກັບອີໂບລາໄດ້ຜົນ ຫລັງພົບ
ຜູ້ຕິດເຊື້ອເລີ່ມຊະລໍຕົວ.
ສຳນັກຂ່າວຕ່າງປະເທດລາຍງານວ່າ ອົງການອະນາໄມໂລກ ຫລື WHO ໄດ້ຖະແຫລງເມື່ອວັນພຸດທີ 5 ພະຈິກຜ່ານ
ມານີ້ ພົບຫລັກຖານທີ່ບົ່ງບອກເຖິງ ຄວາມສາມາດໃນການຈັດການກັບການລະບາດຂອງເຊື້ອອີໂບລາ ເລີ່ມໄດ້ຜົນ
ຫລັງພົບຈຳນວນຜູ້ຕິດເຊື້ອເລີ່ມຊະລໍຕົວລົງ ໃນປະເທດລີເບຍຣີ 2 ອາທິດຕິດຕໍ່ກັນ ແລະ ຈຳນວນຜູ້ຕິດເຊື້ອໄດ້
ຢຸດຈຶ້ງຢູ່ປະເທດກີນີ ເຖິງແມ່ນວ່າໃນເຊຍຣາ ລີໂອນ ຍັງຄົງເພີ່ມຂຶ້ນຢ່າງຕໍ່ເນື່ອງກໍຕາມ.
ຂໍ້ມູນລ່າສຸດຂອງອົງການອະນາໄມໂລກລະບຸວ່າ ໃນໄລຍະ 21 ມື້ທີ່ຜ່ານມາ ເຊິ່ງຖືເປັນເວລາດົນນານສຸດຂອງໄລຍະ
ຟັກຕົວຂອງເຊື້ອດັ່ງກ່າວນັ້ນ ທັງ 3 ປະເທດທີ່ມີການລະບາດ ແມ່ນມີລາຍງານຜູ້ຕິດເຊື້ອເພີ່ມຕື່ມອີກ 1,828 ຄົນ
ໂດຍ 64% ຂອງຜູ້ຕິດເຊື້ອລາຍໃຫຍ່ ແມ່ນຢູ່ເຊຍຣາ ລີໂອນ 22% ແມ່ນຢູ່ໃນລີເບຍຣີ ແລະ ກີນີ ມີຜູ້ຕິດເຊື້ອໃໝ່
14% ຂອງຈຳນວນດັ່ງກ່າວ.
ອົງການອະນາໄມໂລກກ່າວວ່າ ເຖິງແມ່ນພາວະການແຜ່ລະບາດ ຈະມີການຊະລໍຕົວລົງໃນລີເບຍຣີເປັນຄັ້ງທຳອິດ
ເມື່ອໜຶ່ງອາທິດກ່ອນກໍຕາມ, ໄວຣັສຊະນິດນີ້ກໍຍັງອາດຈະຄົງແຜ່ລະບາດຂຶ້ນໃນອັດຕາທະວີຄູນ.