ຮອງຜູ້ວ່າການທະນາຄານກາງມຽນມາໄດ້ຖືກຍິງທີ່ເຮືອນພັກຂອງລາວໃນວັນພະຫັດທີ່ຜ່ານມານີ້, ບໍ່ເຖິງໜຶ່ງອາທິດຫລັງຈາກທີ່ໄດ້ອອກລະບຽບການໃໝ່ທີ່ເຄັ່ງຄັດ ເຊິ່ງອອກຄໍາສັ່ງໃຫ້ແລກປ່ຽນເງິນຕ່າງປະເທດທີ່ຖືຢູ່ໃນບັນຊີທະນາຄານໃນປະເທດທີ່ປົກຄອງໂດຍທະຫານຕ້ອງແລກປ່ຽນເປັນເງິນຕາທ້ອງຖິ່ນ.
ມີລາຍງານທີ່ຂັດແຍ່ງກັນວ່າ ທ່ານ ນາງ ທານ ທານ ສະວີ (Than Than Swe) ທີ່ໄດ້ຮັບການແຕ່ງຕັ້ງໃຫ້ຂຶ້ນຕໍາແໜ່ງຫລັງຈາກກອງທັບໄດ້ຍຶດເອົາອຳນາດໄດ້ລອດຊີວິດຈາກການໂຈມຕີ.
ເຊື່ອກັນລາວວ່າເປັນເຈົ້າໜ້າທີ່ອາວຸໂສທີ່ສຸດທີ່ກ່ຽວຂ້ອງກັບການບໍລິຫານວຽກຂອງກອງທັບທີ່ຈະຖືກຍິງຕັ້ງແຕ່ເດືອນກຸມພາປີກາຍນີ້ ເມື່ອກອງທັບໄດ້ຂັບໄລ່ລັດຖະບານທີ່ຖືກເລືອກຕັ້ງຂອງ ທ່ານ ນາງ ອອງ ຊານ ຊູ ຈິ (Aung San Suu Kyi). ການປະຕິບັດດັ່ງກ່າວໄດ້ພາໃຫ້ເກີດການປະທ້ວງໂດຍສັນຕິຢ່າງກວ້າງຂວາງທີ່ຖືກປາບປາມດ້ວຍກຳລັງສັງຫານ ເຮັດໃຫ້ເກີດການຕໍ່ຕ້ານດ້ວຍກຳລັງອາວຸດທີ່ຜູ້ຊ່ຽວຊານຂອງສະຫະປະຊາຊາດບາງຄົນຖືວ່າເປັນສົງຄາມກາງເມືອງ.
ເຈົ້າໜ້າທີ່ທ້ອງຖິ່ນກ່າວວ່າ ນາງ ທານ ທານ ສະວີ ຖືກຊາຍ 2 ຄົນ ຍິງຕອນທີ່ລາວເປີດປະຕູຫ້ອງພັກຂອງລາວ ຢູ່ທີ່ເມືອງບາຮັນ ນະຄອນຫຼວງຢ່າງກຸ້ງ ເຊິ່ງເປັນເມືອງໃຫຍ່ທີ່ສຸດຂອງປະເທດ. ເຈົ້າໜ້າທີ່ທ້ອງຖິ່ນກ່າວວ່າ ທານ ທານ ສະວີ ໄດ້ຖືກນຳສົ່ງໄປໂຮງໝໍທະຫານ ເຊິ່ງໄດ້ຖືກຢືນຢັນວ່າເສຍຊີວິດແລ້ວ, ແຕ່ລາຍງານຂອງ Radio Free Asia ທີ່ໄດ້ຮັບການສະໜັບສະໜູນຈາກລັດຖະບານສະຫະລັດ ໄດ້ອ້າງເຖິງໂຄສົກຂອງກອງທັບວ່າ ທານ ທານ ສະວີ ກຳລັງໄດ້ຮັບການປິ່ນປົວບາດແຜຂອງລາວ.
ອ້າງອີງຈາກ: AP NEWS