ພົບມົນລະພິດໄມໂຄຣພລາສຕິກທີ່ຝັງເລິກໃນປອດຂອງຄົນທີ່ມີຊີວິດເປັນຄັ້ງທໍາອິດ. ພົບອະນຸພາກໃນຕົວຢ່າງເກືອບທັງໝົດທີ່ໄດ້ວິເຄາະ.
ນັກວິທະຍາສາດກ່າວວ່າ ມົນລະພິດໄມໂຄຣພລາສຕິກປັດຈຸບັນແມ່ນມີຢູ່ທົ່ວທຸກມຸມໂລກ, ເຮັດໃຫ້ຄົນເຮົາບໍ່ສາມາດຫຼີກລ່ຽງໄດ້ ແລະ ໝາຍຄວາມວ່າ “ມີຄວາມກັງວົນເພີ່ມຂຶ້ນກ່ຽວກັບອັນຕະລາຍ” ຕໍ່ສຸຂະພາບ.
ຕົວຢ່າງໄດ້ຖືກນໍາອອກຈາກເນື້ອເຍື່ອທີ່ນໍາອອກຈາກຄົນປ່ວຍ 13 ຄົນ ທີ່ໄດ້ຮັບການຜ່າຕັດ ແລະ ໄດ້ພົບໄມໂຄຣພລາສຕິກໃນຄົນປ່ວຍຈໍານວນ 11 ກໍລະນີ. ອະນຸພາກທີ່ພົບຫຼາຍທີ່ສຸດແມ່ນ ໂພລີໂພຣພີລິນທີ່ໃຊ້ໃນການຫຸ້ມຫໍ່ພລາສຕິກ ແລະ ທໍ່ ແລະ PET ທີ່ໃຊ້ໃນຂວດ. ການສຶກສາສອງຄັ້ງທີ່ຜ່ານມາໄດ້ພົບເຫັນໄມໂຄຣພລາສຕິກໃນອັດຕາທີ່ສູງທີ່ຄ້າຍຄືກັນກັບຢູ່ໃນເນື້ອເຍື່ອປອດໃນລະຫວ່າງການຜ່າສົບ.
ເປັນທີ່ຮູ້ກັນດີຢູ່ແລ້ວວ່າຄົນເຮົາຫາຍໃຈເອົາອະນຸພາກນ້ອຍໆເຂົ້າໄປ ເຊັ່ນດຽວກັນກັບການບໍລິໂພກມັນຜ່ານທາງອາຫານ ແລະ ນໍ້າ. ຄົນງານທີ່ສໍາຜັດກັບໄມໂຄຣພລາສຕິກໃນລະດັບສູງແມ່ນເປັນທີ່ຮູ້ຈັກກັນວ່າມີພະຍາດ.
ໄມໂຄຣພລາສຕິກໄດ້ຖືກກວດພົບຢູ່ໃນເລືອດຂອງມະນຸດເປັນຄັ້ງທໍາອິດໃນເດືອນມີນາ ເຊິ່ງສະແດງໃຫ້ເຫັນວ່າອະນຸພາກດັ່ງກ່າວສາມາດເຂົ້າໄປທົ່ວຮ່າງກາຍ ແລະ ອາດຈະຕິດຢູ່ໃນອະໄວຍະວະຕ່າງໆ. ຜົນກະທົບຕໍ່ສຸຂະພາບແມ່ນຍັງບໍ່ທັນຮູ້ເທື່ອ. ແຕ່ນັກຄົ້ນຄວ້າມີຄວາມກັນວົນວ່າໄມໂຄຣພລາສຕິກຈະເຮັດໃຫ້ເກີດຄວາມເສຍຫາຍຕໍ່ຈຸລັງຂອງມະນຸດໃນຫ້ອງທົດລອງ ແລະ ອະນຸພາກມົນລະພິດທາງອາກາດເຊິ່ງເປັນທີ່ຮູ້ຈັກດີຢູ່ແລ້ວວ່າມັນຈະເຂົ້າໄປໃນຮ່າງກາຍ ແລະ ເຮັດໃຫ້ເສຍຊີວິດກ່ອນໄວອັນຄວນຫຼາຍລ້ານຄົນຕໍ່ປີ.
ການຄົ້ນຄວ້າທີ່ໄດ້ຮັບການຍອມຮັບໃຫ້ຕີພິມເຜີຍແຜ່ລົງວາລະສານ Science of the Total Environment ໄດ້ນໍາໃຊ້ຕົວຢ່າງຂອງເນື້ອເຍື່ອປອດທີ່ແຂງແຮງຈາກບໍລິເວນເປົ້າຫມາຍການຜ່າຕັດ.ໂດຍວິເຄາະອຸນຸພາກທີ່ບໍ່ເກີນຂະໜາດ 0.003ມມ ແລະ ນໍາໃຊ້ເຄື່ອງສະເປັກໂຕຣສໂກປີ ເພື່ອກໍານົດປະເພດຂອງພລາສຕິກ. ນອກນີ້ ຍັງໄດ້ນໍາໃຊ້ຕົວຢ່າງຄວບຄຸມເພື່ອພິຈາລະນາລະດັບຂອງການປົນເປື້ອນໃນພື້ນຫລັງ.
ແຫຼ່ງຂໍ້ມູນອ້າງອິງ: The Guardian