ສູນກາງສະຫະພັນກໍາມະບານລາວ (ສກລ) ຮຽກຮ້ອງໃຫ້ບັນດາວິສາຫະກິດຕ່າງໆ ລວມທັງບັນດາໂຮງງານຕັດຫຍິບ ຈ່າຍຄ່າແຮງງານຂັ້ນຕ່ຳໃຫ້ແກ່ຄົນງານ ເຊິ່ງເພີ່ມຂຶ້ນຈາກ 1,100,000 ກີບ ເປັນ 1,500,000 ກີບ ຕໍ່ເດືອນໃນປີນີ້.
ທາງສະຫະພັນກັງວົນວ່າ ປະເທດລາວຈະປະສົບກັບບັນຫາການຂາດແຄນແຮງງານທີ່ມີສີມື ຖ້າບໍລິສັດບໍ່ຈ່າຍຄ່າແຮງງານຂັ້ນຕ່ຳໃຫ້ສູງຂຶ້ນ ຍ້ອນວ່າມີຄົນງານຈໍານວນຫລາຍຄົນກັບຄືນໄປເຮັດວຽກຢູ່ໄທແລ້ວ.
ພວກເຂົາສ່ວນຫຼາຍແມ່ນມີທັກສະ ແລະ ສາມາດຫາເງິນໄດ້ຫຼາຍໃນໄທ ເຊິ່ງຄ່າແຮງງານຂັ້ນຕໍ່າສູງກວ່າຢູ່ລາວ.
ເຈົ້າໜ້າທີ່ສະຫະພັນກໍາມະບານອາວຸໂສ ຜູ້ທີ່ຂໍບໍ່ປະສົງອອກນາມກ່າວຕໍ່ວຽງຈັນທາມສ໌ວ່າ ການສົ່ງຄົນງານລາວ ຈາກໄທກັບຄືນປະເທດ ເມື່ອພວກເຂົາຖືກປົດອອກຈາກວຽກຍ້ອນພະຍາດລະບາດໃຫຍ່ໄດ້ສ້າງຄວາມຫວັງວ່າ ເຂົາເຈົ້າຈະຊອກຫາວຽກເຮັດງານທຳຢູ່ລາວໄດ້.
ແຕ່ຄ່າຄອງຊີບຢູ່ໃນລາວສູງຂຶ້ນ ແລະ ຄ່າແຮງງານຂັ້ນຕ່ຳຍັງບໍ່ຕອບສະໜອງຄວາມຕ້ອງການພື້ນຖານຂອງຄົນງານ.
ໃນຂະນະດຽວກັນ, ນາຍຈ້າງຂອງໄທຍັງມີຄວາມຕ້ອງການແຮງງານທີ່ມີທັກສະເພີ່ມຂຶ້ນ ແລະ ໃຫ້ຄ່າຈ້າງທີ່ເໝາະສົມ.
ບໍລິສັດຕ່າງໆໃນລາວກໍາລັງປະສົບກັບບັນຫາການຂາດແຄນແຮງງານ ແລະ ຂາດຂໍ້ມູນທີ່ຖືກຕ້ອງກ່ຽວກັບສະພາບ ການທີ່ພາໃຫ້ເກີດບັນຫາຕ່າງໆເຊັ່ນ: ຂະບວນການຈັດຫາງານຢ່າງບໍ່ເປັນທາງການ ແລະ ການຂາດການຄຸ້ມຄອງການຈ້າງງານ.
ໃນຂະນະດຽວກັນຍັງຂາດຕົວຊີ້ວັດຕະຫຼາດວຽກງານກ່ຽວກັບໂອກາດໃນການຈ້າງງານ ແລະ ການວ່າງງານ, ເຈົ້າໜ້າທີ່ກ່າວ.
ຫຼາຍກວ່າ 50% ຂອງຄົນລາວທີ່ເດີນທາງກັບຈາກໄທໃນເດືອນມັງກອນ ແລະ ຄາດວ່າຈໍານວນດັ່ງກ່າວອາດມີເຖິງ 70% ແລະ ມີຄົນປະມານ 200,000 ຄົນ ໄດ້ກັບຄືນມາແລ້ວ.
ເຈົ້າໜ້າທີ່ກ່າວຕື່ມວ່າ “ຖ້າພວກເຮົາບໍ່ເຮັດບາງຢ່າງກ່ຽວກັບຄ່າຈ້າງທີ່ສະເໜີໃຫ້ຢູ່ໃນລາວ ກໍ່ມີແນວໂນ້ມວ່າທຸກຄົນທີ່ກັບລາວຈະເດີນທາງກັບຄືນໄປໄທ”. ລັດຖະບານໄທໄດ້ຜ່ອນຜັນຂໍ້ຈຳກັດກ່ຽວກັບພະຍາດໂຄວິດ-19 ແລະ ແຮງງານອົບພະຍົບຂ້າມປະເທດທີ່ບໍ່ມີເອກະສານຈະໄດ້ຮັບການປະຕິບັດຢ່າງຜ່ອນຄາຍຫຼາຍຂື້ນ.
ສະຖິຕິຂອງກະຊວງແຮງງານ ແລະ ສະຫວັດດີການສັງຄົມກ່າວວ່າ ແຮງງານລາວ 246,000 ກວ່າຄົນ ເດີນທາງກັບລາວຈາກໄທ ນັບຕັ້ງແຕ່ເລີ່ມມີການແຜ່ລະບາດໃຫຍ່ ເມື່ອມີການເຊົາຈ້າງງານເປັນຈໍານວນຫຼວງຫຼາຍ, ແຕ່ວ່າແຮງງານທີ່ສີມື 150,000 ຄົນ ໄດ້ກັບຄືນໄປປະເທດໄທໃນເດືອນມັງກອນປີນີ້.
ແຫຼ່ງຂໍ້ມູນ: VienTiane Times