ໃນທ້າຍເດືອນມັງກອນ – ຕົ້ນເດືອນກຸມພາ 2022 ນີ້ ເຈົ້າໜ້າທີ່ ກອງບັນຊາການ ປກສ ເມືອງໂພນທອງ ແຂວງຫຼວງພະບາງ ຮ່ວມກັບເຈົ້າໜ້າທີກອງບັນຊາການ ປກສ ແຂວງ, ກອງບັນຊາການທະຫານແຂວງ-ເມືອງ ແລະອົງການປົກຄອງບ້ານ ລົງທຳລາຍສວນຝິ່ນ ທີ່ປະຊາຊົນລັກລອບປູກໃນ 14 ບ້ານ, ເຊີ່ງຜ່ານມາເຈົ້າໜ້າທີ່ ໄດ້ສົມທົບກັບອົງການປົກຄອງເມືອງ ແລະ ບ້ານດຳເນີນການສຶກສາອົບຮົມໂດຍເຮັດບົດບັນທຶກ ກັບການປົກຄອງບ້ານ ລວມທັງເຈົ້າຂອງສວນຝິ່ນທັງ 14 ບ້ານ ໃຫ້ຢຸດເຊົາ ແລະໄດ້ອະທິບາຍໃຫ້ຮູ້ເຖີງລະບຽບກົດໝາຍ ເພື່ອບໍ່ໃຫ້ສືບຕໍ່ມີການລັກລອບປູກຝິ່ນຕື່ມອີກ, ແຕ່ຍັງພົບເຫັນປະຊາຊົນຈຳນວນໜຶ່ງ ຍັງຜື້ນດື້ບໍ່ປະຕິບັດຕາມບົດບັນທຶກ ໂດຍສືບຕໍ່ປູກຝິ່ນ ເຊີ່ງເປັນການສ້າງປະກົດການຫຍໍ້ທໍ້ໃນສັງຄົມ ແລະຜິດຕໍ່ລະບຽບກົດໝາຍຂອງ ສປປ ລາວ.
ການໄປທຳລາຍສວນຝິ່ນໄດ້ແບ່ງອອກເປັນ 05 ຈຸ ເຊີ່ງພົບຄວາມຫຍຸ້ງຍາກຫຼາຍປະການ ເປັນຕົ້ນເສັ້ນທາງໄປຫາພື້ນທີປູກຝິ່ນຢູ່ໄກ, ພູຜາສູງຊັນ, ທຸລະກັນດານຕ້ອງໃຊ້ເວລາຍ່າງ 4-5 ຊົ່ວໂມງ ສະພາບດິນຟ້າອາກາດບໍ່ອຳນວຍ, ອາກາດໜາວ, ມີຝົນຕົກ, ຕາມການກວດກາ ແລະສໍາຫຼວດຕົວຈິງ ທັງ 5 ຈຸດ ພົບເຫັນພື້ນທີປູກຝິ່ນປະມານ 153,74 ເຮັກຕາ, ມີ 23 ຈຸດ ແລະໄດ້ທຳລາຍສຳເລັດ ແລະຍັງອີກຈຳນວນໜຶ່ງ ແມ່ນບໍ່ສາມາດທຳລາຍໄດ້ຍ້ອນກົກຢາຝິ່ນຍັງນ້ອຍ ມີເນື້ອທີປະມານ 42,1 ເຮັກຕາ, ເຊີ່ງເຈົ້າໜ້າທີ່ ໄດ້ເຮັດບົດບັນທຶກໃຫ້ເຈົ້າຂອງສວນຝິ່ນ ເພື່ອໃຫ້ເຂົາເຈົ້າ ຕື່ນຕົວທຳລາຍເອງ.
ຂ່າວ: ຮທ ແຄມ ໄຊຍະທິ.