ເມື່ອບໍ່ດົນມານີ້ ເຈົ້າໜ້າທີ່ຕຳຫລວດເສດຖະກິດ ໄດ້ຈັບຕົວ ທ້າວ ຄຳຫລ້າ ອາຍຸ 45 ປີຢູ່ບ້ານ ໄຊສະຫວ່າງ ເມືອງໄຊທານີ
ນະຄອນຫລວງວຽງຈັນ ພ້ອມພັກພວກອີກ 4 ຄົນ, ພາຍຫລັງພວກເຂົາໄດ້ຮ່ວມກັນແອບອ້າງເປັນເຈົ້າໜ້າທີ່ຕຳຫລວດ
ເພື່ອສໍ້ໂກງຊັບພົນລະເມືອງ ດ້ວຍການຕົວະຍົວະເອົາຄົນເຂົ້າຮຽນຕຳຫລວດ ແລະ ປອມແປງເອກະສານ, ເຊິ່ງມີຜູ້ຕົກ
ເປັນເຫຍື່ອມາແລ້ວຫລາຍລາຍ.
ຮອງຫົວໜ້າກົມຕຳຫລວດເສດຖະກິດທ່ານ ພັນໂທ ບຸນຖິ່ນ ແກ້ວມົນລັດຊີໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກຄະນະ
ຄູອາຈານ ຢູ່ໂຮງຮຽນຕຳຫລວດນາຍສີບເມືອງປາກງື່ມວ່າ ໄດ້ມີສະພາບຫຍໍ້ທໍ້ບໍ່ດີເກີດຂຶ້ນພາຍໃນໂຮງຮຽນ, ເນື່ອງຈາກ
ມີນັກຮຽນຈຳນວນໜຶ່ງ ຖືກຄົນບໍ່ດີກຸ່ມໜຶ່ງແອບອ້າງເປັນຕຳຫລວດ ແລ້ວມາຕົວະຕົ້ມຫລອກລວງວ່າສາມາດເອົາເຂົ້າ
ໂຮງຮຽນຕຳຫລວດແຫ່ງດັ່ງກ່າວໄດ້, ຫລັງຈາກນັ້ນ ຈຶ່ງໄດ້ສົ່ງເຈົ້າໜ້າທີ່ລົງຕິດຕາມກຸ່ມຄົນບໍ່ດີດັ່ງກ່າວ, ຈົນສາມາດຈັບ
ຕົວຜູ້ກະທຳຜິດໄດ້ 5 ຄົນ, ໃນນັ້ນຜູ້ເປັນຫົວໂປ່ໂຕການແມ່ນ ທ້າວ ຄຳຫລ້າ ແລະ ຜ່ານການສືບສວນ- ສອບສວນ ຂອງ
ເຈົ້າໜ້າທີ່ຜູ້ກ່ຽວຮັບສາລະພາບວ່າ: ຕົນພ້ອມດ້ວຍໝູ່ໄດ້ ຮ່ວມກັນເຄື່ອນໄຫວສໍ້ໂກງຊັບພົນລະເມືອງມາດົນແລ້ວ ດ້ວຍ
ການແອບອ້າງເປັນເຈົ້າໜ້າທີ່ ແລ້ວໃຫ້ໝູ່ຮ່ວມຂະບວນການໄປຊອກຫາຄົນທີ່ຢາກຮຽນຕຳຫລວດນາຍສີບ ໃນລາຄາ
35,000ບາດ (ສະກຸນເງິນໄທ) ຫລື ປະມານ 9 ລ້ານກີບ ແລະ ຖ້າຕ້ອງການໄປຮຽນຢູ່ຕ່າງປະເທດ ໂດຍສະເພາະຢູ່ຫວຽດ
ນາມ ແລະ ສປ ຈີນ ແມ່ນ 70,000 ບາດ ຫລືປະ ມານ 17 ລ້ານກວ່າກີບ ແລະ ເມື່ອມີຜູ້ຕົກລົງຈ້າງໄປຮຽນແລ້ວ ພວກຕົນ
ກໍພາກັນເຮັດເອກະສານປອມແປງຂຶ້ນມາ, ພ້ອມທັງພິມກາຈ້ຳ ແລະ ລາຍເຊັນຂອງກົມກອງກ່ຽວຂ້ອງຕ່າງໆ ທີ່ເປັນຂອງ
ປອມ ເພື່ອໃຫ້ຜູ້ທີ່ຈ້າງເບິ່ງແລ້ວຫລົງເຊື່ອວ່າເປັນເອກະສານຈິງ ແລະ ໄດ້ຈ່າຍເງິນໃຫ້ຕາມທີ່ໄດ້ຕົກລົງກັນ, ຫລັງຈາກນັ້ນ
ກໍເອົາເງິນແບ່ງປັນກັນ ແລະ ຫາຍໜີໄປຕົວະຄົນໃໝ່ໄປເລື້ອຍໆ ຈົນຖືກເຈົ້າໜ້າທີ່ຈັບຕົວມາດຳເນີນຄະດີຕາມລະບຽບ
ກົດໝາຍ.
ແຫລ່ງຂ່າວ: ລາວພັດທະນາ