ເຈົ້າໜ້າທີ່ຖະແຫຼງເຫດການຄວາມບໍ່ສະຫງົບຢູ່ບໍລິສັດແຫ່ງໜຶ່ງທີ່ບ້ານດົງໃຕ້ ແຂວງຄຳມ່ວນ
___________
ສອງສາມມື້ຜ່ານມານີ້ ໄດ້ເກີດເຫດການກຳມະກອນຄົນຈີນຮ່ວມຕົວກັນກໍ່ເຫດຄວາມບໍ່ສະຫງົບເພື່ອທວງເອົາຄ່າແຮງງານນຳບໍລິສັດແຫ່ງໜຶ່ງຢູ່ບ້ານດົງໃຕ້ ເມືອງທ່າແຂກ ແຂວງຄຳມ່ວນ ຈົນກຳລັງທະຫານທີ່ຮັບຜິດຊອບ ໃນເຂດດັ່ງກ່າວຍິງປືນຂຶ້ນຟ້າ ຫຼາຍນັດ ເພື່ອຄວບຄຸມເຫດການ. ເຫດການດັ່ງກ່າວໄດ້ເຮັດໃຫ້ສັງຄົມສົນໃຈ.
ຕໍ່ກັບເຫດການດັ່ງກ່າວ ໃນວັນທີ 2 ກຸມພາ 2022, ເຈົ້າໜ້າທີ່ ກຳລັງ ປກຊ-ປກສ ແຂວງຄຳມ່ວນ ໂດຍມີທ່ານ ພັທ ບຸນເລີດ ບຸບຜາວັນ ຮອງຫົວໜ້າກອງບັນຊາການ ປກຊ ແຂວງຄຳມ່ວນ, ທ່ານ ພັທ ຄຳຮຸ່ງ ອາລຸນສັກ ຮອງຫົວໜ້າກອງບັນຊາການ ປກສ ແຂວງ ແລະ ທ່ານ ພັທ ພູນສຸກ ໄຊສົມບັດ ຮອງຫົວໜ້າຫ້ອງສັນຕິບານ ປກສ ແຂວງ ໄດ້ຖະແຫຼງກ່ຽວກັບເຫດການດັ່ງກ່າວວ່າ: ໃນເວລາປະມານ 8:30-9:00 ໂມງຂອງວັນທີ 30 ມັງກອນ 2022 ຢູ່ບໍລິສັດ ຊີໂນ-ອາກຣີ ໂປຕາສ ຕັ້ງຢູ່ບ້ານດົງໃຕ້ ເມືອງທ່າແຂກ ໄດ້ເກີດເຫດການມີກຳມະກອນຊາວຈີນ ຈຳນວນ 35 ຄົນ ຂອງບໍລິສັດ ຊິງອ່ານ ອຸດສາຫະກຳຈຳກັດ ເຊິ່ງເປັນບໍລິສັດຮັບເໝົາກໍ່ສ້າງຫໍພັກກຳມະກອນ ໃຫ້ແກ່ບໍລິສັດ ຊີໂນ-ອາກຣີ ໂປຕາສ ຈຳກັດ, ບໍລິສັດດັ່ງກ່າວໄດ້ເລີ່ມລົງມືກໍ່ສ້າງໃນຕົ້ນປີ 2021 ເຊິ່ງໄດ້ຕົກລົງ ກັນວ່າ ພາຍຫຼັງກໍ່ສ້າງສຳເລັດແລ້ວ ທາງບໍລິສັດ ຊີໂນ-ອາກຣີ ໂປຕາສ ຈຳກັດ ຈະຈ່າຍມູນຄ່າການກໍ່ສ້າງໃຫ້ບໍລິສັດ ຊິງອ່ານ ອຸດສາຫະກຳ ໃນຈຳນວນ 85% ຂອງມູນຄ່າການກໍ່ສ້າງທັງໝົດ ສ່ວນທີ່ເຫຼືອອີກ 15% ແມ່ນພາຍຫຼັງ ໄດ້ກວດກາໂຄງການແລ້ວຈະຈ່າຍອີກ 5-10% ແລະ ຍັງເຫຼືອອີກ 5% ແມ່ນແຮໄວ້ເພື່ອຮັບປະກັນຄຸນນະພາບ ຂອງການກໍ່ສ້າງ.
ໂຄງການກໍ່ສ້າງດັ່ງກ່າວແມ່ນໄດ້ສຳເລັດໃນເດືອນພະຈິກ ປີ 2021 ແລະ ບໍລິສັດ ຊີໂນ-ອາກຣີ ແມ່ນໄດ້ຈ່າຍມູນຄ່າການກໍ່ສ້າງໃຫ້ແກ່ບໍລິສັດຊິງອ່ານ ແລ້ວ 85% ຕາມການຕົກລົງ. ແຕ່ບໍລິສັດ ຊິງອ່ານບໍ່ຈ່າຍເງິນເດືອນໃຫ້ກຳມະມະກອນຄົບຕາມຈຳນວນ ຈິ່ງເປັນສາເຫດຂອງກຳມະກອນຄົນສັນຊາດຈີນຂອງບໍລິສັດຊິງອ່ານ ກໍ່ເຫດການຄັ້ງນີ້ຍ້ອນຄວາມບໍ່ພໍໃຈ ຕໍ່ບໍລິສັດຊິງອ່ານ ທີ່ບໍ່ຈ່າຍເງິນເດືອນເປັນຈຳນວນ 02 ເດືອນ (ເດືອນ 11,12 ປີ 2021) ແລະ ເງິນຄ່າເດີນທາງ ກັບປະເທດ ເພາະວ່າໃນເບື້ອງຕົ້ນ ບໍລິສັດຊິງອ່ານ ໄດ້ໃຫ້ສັນຍາວ່າ ພາຍຫຼັງໂຄງການສຳເລັດ ແມ່ນຈະຈ່າຍ ຄ່າເດີນທາງໃຫ້ກຳມະກອນກັບຄືນປະເທດຈີນ ແຕ່ຍ້ອນສະພາບໂຄວິດ-19 ຈຶ່ງເຮັດໃຫ້ຄ່າເດີນທາງເພີ່ມຂຶ້ນ ຈາກໃນ ເມື່ອກ່ອນ 3.000 ຢວນ ມາເປັນປະມານ 5.000 ຢວນຕໍ່ຄົນ ຈຶ່ງເຮັດໃຫ້ບໍລິສັດ ຊິງອ່ານ ບໍ່ສາມາດຈ່າຍ ໃຫ້ໄດ້ຕາມຄວາມຮຽກຮ້ອງຕ້ອງການຂອງກຳມະກອນ ບໍລິສັດສາມາດຈ່າຍໃຫ້ໄດ້ 4.000 ຕໍ່ຄົນ.
ກຳມະກອນຈຳນວນດັ່ງກ່າວຈຶ່ງໄດ້ວາງແຜນຮວມຕົວກັນ ເພື່ອສ້າງ ສະຖານະການໃຫ້ບໍລິສັດ ຊີໂນ-ອາກຣີ ຮັບຮູ້ຈຸດປະສົງ ແລະ ໃຫ້ບໍລິສັດຊີໂນ-ອາກຣີ ຮຽກຮ້ອງໃຫ້ບໍລິສັດຊິງອ່ານ ຕ້ອງຈ່າຍເງິນເດືອນທີ່ຍັງຄ້າງ ແລະ ຮັບຜິດຊອບ ຄ່າເດີນທາງໃຫ້ເພື່ອຈະໄດ້ກັບປະເທດຈີນ ໂດຍການເອົາເຫຼັກມາຕັນທາງເຂົ້າຫໍພັກ.
ເມື່ອເປັນແນວນັ້ນ ທາງກຳລັງທະຫານທີ່ປະຈຳການ ປ້ອງກັນຢູ່ບໍລິສັດຈຶ່ງໄດ້ເຂົ້າມາລະງັບເຫດການ ແຕ່ສະຖານະການຍິ່ງມີຄວາມ ຮຸນແຮງຂຶ້ນ ພວກກຳມະກອນຄົນສັນຊາດຈີນ ໄດ້ໄລ່ຍາດຊີງເອົາປືນຈາກກຳລັງທະຫານ ເພື່ອເປັນການສະກັດກັ້ນ ບໍ່ໃຫ້ເຫດການທີ່ເກີດຂຶ້ນຮຸງແຮງ ແລະ ບານປາຍ ທາງເຈົ້າໜ້າທີ່ທະຫານຈຶ່ງໄດ້ນຳໃຊ້ອາວຸດປືນຍິງຂຶ້ນຟ້າຈຳນວນ ຫຼາຍນັດ ຈຶ່ງເຮັດໃຫ້ສະຖານະການຄ່ອຍຜ່ອນຄາຍລົງ.
ຂໍ້ມູນ: ເພຈ ຄວາມສະຫງົບ Lao Security News