ອີງຕາມການລາຍງານຈາກ ວິທະຍຸສາກົນແຫ່ງປະເທດຈີນປະຈຳລາວ (CRI) ໄດ້ລາຍງານວ່າ: ນັບຕັ້ງແຕ່ມາຮອດວັນທີ 30 ມັງກອນນີ້ ກຸ່ມບໍລິສັດທາງລົດໄຟຈີນຈຳກັດສາຂາຄຸນມິງ ໄດ້ເປີດເຜີຍກ່ຽວກັບຄວາມຄືບໜ້າການຂົນສົ່ງຜູ້ໂດຍສານ ແລະ ສິນຄ້າຂອງທາງລົດໄຟລາວ-ຈີນໄດ້ມີຄວາມຄືບໜ້າຢ່າງວ່ອງໄວໂດຍໄດ້ສົ່ງຜູ້ໂດຍສານຫຼາຍກວ່າ 1 ລ້ານເທື່ອຄົນ ແລະ ສິນຄ້າຂ້າມຊາດຫຼາຍກວ່າ 1 ແສນໂຕນ.
ທ່ານຊູເຈຍເຟີງ ຫົວໜ້າພະແນກການຕະຫຼາດຂອງສະຖານີລົດໄຟຄຸນມິງຕາເວັນອອກຂອງ ກຸ່ມບໍລິສັດທາງລົດໄຟຈີນຈຳກັດສາຂາຄຸນມິງກ່າວວ່າ: ປັດຈຸບັນປະເພດສິນຄ້າທີ່ຂົນສົ່ງດ້ວຍທາງລົດໄຟລາວ-ຈີນໄດ້ເພີ່ມຂຶ້ນຢ່າງບໍ່ຢຸດຢັ້ງ ສ່ວນການຂົນສົ່ງສິນຄ້າຕາມທາງລົດໄຟລາວ-ຈີນ ມີປະເພດຕ່າງໆເຊັ່ນ: ການຂົນສົ່ງອາຫານ ແລະ ເຄື່ອງໃຊ້ປະຈຳວັນຊະນິດຕ່າງໆ ບໍ່ວ່າຈະເປັນເຂົ້າສານ, ເບຍ ແລະອື່ນໆ ໄດ້ເພີ່ມຂຶ້ນເປັນກ້າວໆ.
ໃນປັດຈຸບັນທາງລົດໄຟລາວ-ຈີນຢູ່ໃນປະເທດລາວກໍໄດ້ເພີ່ມຂະບວນລົດໄຟໄປກັບ 1 ຫຼື 2 ຂະບວນຕໍ່ມື້ ໂດຍອີງຕາມສະພາບຄວາມຕ້ອງການດ້ານຂົນສົ່ງຜູ້ໂດຍສານ. ສ່ວນທາງລົດໄຟລາວ-ຈີນຕອນຢູ່ໃນປະເທດຈີນໄດ້ມີລົດໄຟໄປກັບສະເລ່ຍ 28,5 ຂະບວນຕໍ່ມື້, ເພີ່ມຂຶ້ນ 9 ຂະບວນເມື່ອທ່ຽບໃສ່ໄລຍະກ່ອນການຂົນສົ່ງຜູ້ໂດຍສານໄລຍະ ບຸນກຸດຈີນ, ສະເລ່ຍແລ້ວໄດ້ເພີ່ມບ່ອນນັ່ງແລະຕຽງນອນ 3 ໝື່ນ 9 ພັນບ່ອນຕໍ່ມື້, ເພີ່ມຂຶ້ນ 40%.