ສໍານັກງານຢາແຫ່ງສະພາບເອີຣົບ (EMA) ເຕືອນວ່າ ການສັກວັກຊີນປ້ອງກັນໂຄວິດ-9 ເຂັມກະຕຸ້ນ ຫຼື ບູສເຕີໂດສ ຫຼາຍເກີນໄປອາດຈະເຮັດໃຫ້ພູມຄຸ້ມກັນຂອງຮ່າງກາຍອ່ອນແອລົງໄດ້ ເຊິ່ງໝາຍຄວາມວ່າ ວັກຊີນບູສເຕີ ເຂັມຕໍ່ໆໄປອາດໃຊ້ບໍ່ໄດ້ຜົນ.
ທ່ານ ມາໂກ ຄາວາເລຣີ ຫົວໜ້າຝ່າຍຍຸດທະສາດ ວັກຊີນຂອງ ສໍານັກງານຢາແຫ່ງສະຫະພາບເອີຣົບກ່າວວ່າ: ການສັກວັກຊີນເຂັມບູສເຕີນັ້ນ ສາມາດສັກໄດ້ ໜຶ່ງ ຫຼື ສອງຄັ້ງ ໃນລັກສະນະດຽວກັນກັບການສັກວັກຊີນປ້ອງກັນໄຂ້ຫວັດໃຫຍ່ທີ່ສັກປີລະຄັ້ງ ແຕ່ບໍ່ຄວນສັກຖີ່ເກີນໄປ ແລະ ສັກຕໍ່ເນື່ອງ.
ຄໍາເຕືອນດັ່ງກ່າວ ໝາຍເຖິງການສັກວັກຊີນປ້ອງກັນ ໂຄວິດ-19 ເຂັມທີ 4 ເຊິ່ງສອດຄ່ອງກັບຜູ້ຊ່ຽວຊານດ້ານສາທາລະນະສຸກຂອງອັງກິດທີ່ລະບຸວ່າຍັງບໍ່ມີຄວາມຈໍາເປັນທີ່ຈະສັກວັກຊີນເຂັມທີ 4 ໃຫ້ປະຊາຊົນພ້ອມຢືນຢັນວ່າ ວັກຊີນເຂັມທີ 3 ກໍສາມາດປ້ອງກັນອາການເຈັບປ່ວຍໜັກ ແລະ ປ້ອງກັນເສຍຊີວິດໄດ້ແລ້ວ
ໃນຂະນະທີ່ອົງການອະນາໄມໂລກຢໍ້າວ່າ: ໂຄງການສັກວັກຊີນເຂັມກະຕຸ້ນແບບລັກສະນະຫວ່ານແຫ ໃນບັນດາປະເທດຮັ່ງມີ ອາດເຮັດໃຫ້ການແຜ່ລະບາດຂອງພະຍາດໂຄວິດຍືດເຍື້ອອອກໄປອີກເພາະພາລະກິດສໍາຄັນຄືການຫຼຸດອັດຕາການເສຍຊີວິດຈາກໂຄວິດ-19 ລົງ ແລະ ຊ່ວຍໃຫ້ປະເທດທຸກຍາກບັນລຸເປົ້າໝາຍການສັກວັກຊີນໃຫ້ປະຊາຊົນເສຍກ່ອນ.
ຂໍ້ມູນ: ໜັງສືພິມເສດຖະກິດການຄ້າ