ຕາມຖະແຫຼງການ ວັນທີ 6 ມັງກອນ 2022 ໂດຍ ດຣ. ລາຫຸນ ຈັນທະບຸດ ໄດ້ລາຍງານວ່າ ສະພາບການລະບາດພະຍາດໂຄວິດ-19 ໃນ ສປປລາວ ຍັງສືບຕໍ່ມີລາຍງານຜູ້ຕິດເຊື້ອເພີ່ມຂື້ນ, ມື້ນີ້ກໍ່ເປັນອີກມື້ໜື່ງທີ່ໂຕເລກຜູ້ຕິດເຊື້ອຫຼາຍກ່ວາ 1,000 ຄົນ ແລະ ການເພີ່ມຂື້ນກໍ່ສືບເນື່ອງຈາກພາຍຫຼັງການສະເຫຼີມສະຫຼອງປີໃໝ່ສາກົນທີ່ຜ່ານມາ ແລະ ຄາດຄະເນວ່າໂຕເລກລາຍງານຜູ້ຕິດເຊື້ອອາດຈະຍັງສືບຕໍ່ເພີ່ມຂື້ນ, ສະນັ້ນ ຈີ່ງຂໍຮຽກຮ້ອງໃຫ້ທຸກຄົນທີ່ມີອາການບໍ່ສະບາຍຄ້າຍຄືໄຂ້ຫວັດ ຫຼື ມີປະຫວັດໄດ້ສຳຜັດກັບຜູ້ຕິດເຊື້ອມາກ່ອນຈົ່ງພາກັນໄປກວດຫາເຊື້ອ ແລະ ປີ່ນປົວໃຫ້ທັນເວລາ.
• ໄລຍະນີ້ ກໍ່ກ້າວເຂົ້າສູ່ງານບຸນປະເພນີຂອງຫຼາຍຊົນຊາດຊົນເຜົ່າ, ໂດຍສະເພາະງານບຸນກີນຈຽງ, ງານບຸນປີໃໝ່ຂອງເຜົ່າກືມມຸ, ບຸນປະເພນີກອງເຂົ້າ,ງານດອງ, ງານຂື້ນເຮືອນໃໝ່ ແລະ ບຸນອື່ນໆ ເຊີ່ງເປັນບຸນປະເພນີທີ່ສືບເນື່ອງມາຈາກບັນພະບຸລຸດທີ່ເຄີຍໄດ້ປະຕິບັດມາ, ຂ້າພະເຈົ້າຂໍຮຽກຮ້ອງມາຍັງຄະນະສະເພາະກິດຂັ້ນແຂວງ, ເມືອງ, ອຳນາດກັານປົກຄອງທຸກຂັ້ນຈົ່ງເອົາໃຈໃສ່ ຊີ້ນຳການຈັດປະຕິບັດມາດຕະການປ້ອງກັນການຕິດເຊື້ອພະຍາດໂຄວິດ-19 ຢ່າງເຄັ່ງຄັດ,ໂດຍສະເພາະການຈັດງານປະເພນີກໍ່ຂໍໃຫ້ເຮັດແບບກະທັດຮັດສະເພາະຄົນໃນຄອບຄົວ, ຮັກສາໄລຍະຫ່າງ, ໃສ່ຜ້າປິດປາກ-ດັງ ແລະ ຫຼີກລຽງການຊຸມແຊວແບບເປັນຈຸ້ມ ທັງນີ້ກໍ່ເພື່ອປ້ອງກັນບໍ່ໃຫ້ຕິດເຊື້ອ ເພາະຫຼາຍທ່ານຄິດວ່າການຕິດເຊື້ອພະຍາດໂຄວິດ-19 ປັດຈຸບັນບໍ່ມີອາການຮຸນແຮງ ແຕ່ກົງກັນຂ້າມຖ້າມີການຕິດເຊື້ອໃນຜູ້ສູງອາຍຸ ຫຼື ຜູ້ທີ່ມີພະຍາດປະຈຳໂຕ, ຜູ້ທີ່ບໍ່ທັນສັກວັກຊີນກໍ່ຈະເຮັດໃຫ້ມີອາການຮຸນແຮງ ແລະ ອາດຈະກ້າວສູ່ການເສຍຊີວິດໄດ້.
• ອີກເທື່ອໜື່ງ, ພວກເຮົາກໍ່ໄດ້ຮັບຟັງກ່ຽວກັບການຖະແຫຼງການກ່ຽວກັບການນຳໃຊ້ຢາປີ່ນປົວພະຍາດໂຄວີດ-19 ທີ່ ສປປລາວ ເຮົາສາມາດຜະລິດມານຳໃຊ້ ຖືວ່າເປັນຂ່າວດີຂອງສັງຄົມລາວທີ່ໄດ້ນຳໃຊ້ຢາປີ່ນປົວຢ່າງມີປະສິດທິພາບ ແລະ ຂ່າວດີອີກຢ່າງໜື່ງ ໃນບໍ່ດົນມານີ້ ທາງ ສປ ຈີນ ກໍ່ໄດ້ຄົ້ນພົບ ແລະ ທົດລອງນຳໃຊ້ຢາປີ່ນປົວພະຍາດໂຄວິດ-19 ທີ່ສາມາດຢັບຢັ້ງ ແລະ ປີ່ນປົວຜູ້ທີ່ຕິດເຊື້ອຈາກສາຍພັນໂອມິຄຣອນໄດ້ ສະນັ້ນຖືວ່າການຄົ້ນຄ້ວາໃນຄັ້ງນີ້ອາດຈະເປັນຂ່າວດີທີ່ພວກເຮົາຈະສາມາດຢັບຢັ້ງ ແລະ ຄວບຄຸມສະພາບການລະບາດໄດ້ ແຕ່ທັງນີ້ກໍ່ຕ້ອງຄຽງຄູ່ໄປກັບການເລັ່ງສັກຢາວັກຊີນໃຫ້ສູງຕາມເປົ້າໝາຍ.