ຄະນະສະເພາະກິດ ນະຄອນຫຼວງວຽງຈັນ ໄດ້ອອກແຈ້ງການຫ້າມບໍ່ໃຫ້ມີການຊຸມແຊວຕາມບ້ານເຮືອນ ຫຼື ບໍລິການເຄື່ອງດື່ມທີ່ມີທາດເຫຼົ້າຕາມຮ້ານອາຫານຕ່າງໆໄລຍະສະເຫຼີມສະຫຼອງປີໃໝ່ສາກົນ 2022 ທີ່ຈະມາເຖິງນີ້.
ອີງຕາມແຈ້ງການຂອງຄະນະສະເພາະກິດ ນະຄອນຫຼວງວຽງຈັນ ໃນວັນທີ 27 ທັນວາ 2021, ວ່າດ້ວຍການເພີ່ມທະວີຄວາມຮັບຜິດຊອບໃນການກວດກາ ແລະປະຕິບັດມາດຕະການຕໍ່ຫົວໜ່ວຍທຸລະກິດໃນໄລຍະກະກຽມຕ້ອນຮັບປີໃໝ່ສາກົນ 2022 ໂດຍຫ້າມບໍ່ໃຫ້ມີການສວຍໂອກາດບໍລິການເຄື່ອງດື່ມທີ່ມີທາດເຫຼົ້າຢ່າງເດັດຂາດ ຖ້າຮ້ານໃດລະເມີດແມ່ນຈະຖືກສັ່ງປິດກິດຈະການ ພ້ອມປັບໃໝ ແລະຖອນໃນອະນຸຍາດ ແລະຈະດຳເນີນຄະດີຕໍ່ຫົວໜ່ວຍທຸລະກິດທີ່ເປັນຕົ້ນເຫດຂອງການແຜ່ລະບາດຂອງພະຍາດໂຄວິດ-19 ນຳອີກ.
ນອກຈາກນີ້, ກໍຫ້າມບໍ່ໃຫ້ມີການຈັດກິດຈະກຳເຕົ້າໂຮມຊຸມແຊວ ແລະການຈັດງານລ້ຽງສ້າງສັນທຸກຮູບແບບຢູ່ທຸກສະຖານທີ່ຢ່າງເດັດຂາດ.
