ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ທ່ານ ເດວິດ ພາວເວລ ໝໍ ແລະ ທີ່ປຶກສາທາງການແພດຂອງສະມາຄົມຂົນສົ່ງທາງອາກາດລະຫວ່າງປະເທດ(IATA) ໄດ້ເປີດເຜີຍກັບສໍານັກຂ່າວວ່າ ນັບຕັ້ງແຕ່ມີໂຄວິດ-19 ສາຍພັນໂອໄມຄຣອນ ຜູ້ໂດຍສານໃນເຄື່ອງບິນມີໂອກາດຕິດເຊື້ອໂຄວິດ-19 ໄດ້ປະມານ 2-3 ເທົ່າໃນໄລຍະທີ່ຢູ່ເທິງເຄື່ອງບິນ ເຖິງແມ່ນວ່າເຄື່ອງບິນຈະມີລະບົບກັ່ນຕອງອາກາດແບບດຽວກັນທີ່ໃຊ້ກັບໂຮງໝໍກໍຕາມ.

ທ່ານ ພາວເວລ ໄດ້ກ່າວວ່າ ນັ່ງເຄື່ອງບິນຊັ້ນທຸລະກິດອາດຈະປອດໄພກວ່ານັ່ງຊັ້ນປະຢັດທີ່ມີຜູ້ໂດຍສານໜາແໜ້ນ ແລະ ຜູ້ໂດຍສານຕ້ອງຫຼີກຫຼ່ຽງການສໍາພັດແບບປະເຊີນໜ້າກັນ ລວມທັງຜູ້ທີ່ນັ່ງຕິດກັບຄົນອື່ນຈະຕ້ອງບໍ່ຖອດໜ້າກາກອະນາໄມ. ຄວາມສ່ຽງການຕິດເຊື້ອຢູ່ເທິງເຄື່ອງບິນອາດເພີ່ມຂຶ້ນ ເຊັ່ນດຽວກັນກັບຄວາມສ່ຽງເວລາທີ່ເຮົາໄປຫ້າງຊັບພະສິນຄ້າ ຫຼື ຂຶ້ນລົດໃນລະບົບຂົນສົ່ງສາທາລະນະ.