ເວັບໄຊ ຊີເອັນເອັນ ລາຍງານ: ຈີນກວດພົບຍອດຜູ້ຕິດເຊື້ອໂຄວິດ-19 ລາຍໃໝ່ 52 ລາຍໃນເມືອງ ຊີອານ ເຊິ່ງຕັ້ງຢູ່ທາງພາກກາງຂອງຈີນ ໃນວັນທີ 22 ທັນວາ 2021 ຜ່ານມາ ເຮັດໃຫ້ທາງການຮີບຮ້ອນກຳນົດມາດຕາການລັອກດາວແບບເຂັ້ມງວດກັບຜູ້ຢູ່ອາໄສພາຍໃນເມືອງດັ່ງກ່າວ ຈຳນວນ 13 ລ້ານຄົນ.
ຊີອານ, ເມືອງບູຮານທີ່ຮູ້ຈັກກັນໃນລະດັບສາກົນວ່າເປັນໝູ່ບ້ານປະຕິມະກຳຂອງນັກຮົບດິນເຜົາອາຍຸ 2000 ປີ ກວດພົບຜູ້ຕິດເຊື້ອໂຄວິດລາຍທຳອິດທີ່ກ່ຽວຂ້ອງກັບການລະບາດຄັ້ງຫຼ້າສຸດ ທີ່ໂຮງແຮມກັກກັນແຫ່ງໜຶ່ງພາຍໃນເມືອງ ໃນວັນທີ 9 ທັນວາຜ່ານມາ ເຊິ່ງເຊື່ອກັນວ່າ ໄວຣັສໄດ້ແຜ່ລະບາດສູ່ຊຸມຊົນຜ່ານພະນັກງານໂຮງແຮມທີ່ຕິດເຊື້ອ ຂະນະທີ່ເຈົ້າໜ້າທີ່ເຊື່ອວ່າການຕິດເຊື້ອດັ່ງກ່າວ ເຊື່ອມໂຍງກັບຖ້ຽວບິນຂາເຂົ້າ ຈາກປາກິດສະຖານ ຄັ້ງວັນທີ 4 ທັນວາ ເຊິ່ງພົບວ່າມີຜູ້ໂດຍສານຢ່າງໜ້ອຍ 6 ຄົນຕິດເຊື້ອໂຄວິດສາຍພັນເດລຕ້າ ແຕ່ຍັງບໍ່ມີລາຍງານກ່ຽວກັບສາຍພັນໂອໄມຄຣອນໃນຊີອານ.
ປັດຈຸບັນ ເມືອງຊີອານຢູ່ພາຍໃຕ້ການລັອກດາວທີ່ເຂັ້ມງວດ ເຊິ່ງບໍ່ອະນຸຍາດໃຫ້ປະຊາຊົນອອກຈາກບ້ານເຮືອນຂອງຕົນ ຍົກເວັ້ນກໍລະນີສຸກເສີນ ແຕ່ກໍອະນຸຍາດສະມາຊິກພາຍໃນເຮືອນພຽງ 1 ຄົນອອກຕະຫຼາດໄດ້.