ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ໃນວັນທີ 22 ທັນວາ 2021 ເກີດດິນຖະຫຼົ່ມໃນພື້ນທີ່ເໝືອງໃນທາງພາກເໜືອຂອງມຽນມາ ໃນເວລາປະມານ4:00 ເຮັດໃຫ້ມີຜູ້ເສຍຊີວິດຢ່າງໜ້ອຍ 1 ຄົນ ແລະ ມີຜູ້ຄົນສູນຫາຍອີກປະມານ 70 ຄົນ.
ເຈົ້າໜ້າທີ່ກູ້ໄພໄດ້ມີການຕິດຕາມ ແລະ ຄົ້ນຫາຜູ້ທີ່ຕິດຄ້າງຢູ່ເໝືອງ ເຊິ່ງສ່ວນໃຫຍ່ເປັນຄົນທີ່ເຮັດວຽກໃນເໝືອງແບບຜິດກົດໝາຍ ສ່ວນສາເຫດຂອງດິນຖະຫຼົ່ມນັ້ນແມ່ນອາດຈະມາຈາກຫິນທີ່ທີ່ຕົກອອກຈາກລົດບັນທຸກສະສົມກັນເປັນກອງຂະໜາດໃຫຍ່ ແລະ ຢູ່ບໍລິເວນນັ້ນບໍ່ມີຕົ້ນໄມ້ ເຮັດໃຫ້ຄົນທີ່ເຮັດໜ້າທີ່ຂຸດເໝືອງຕ້ອງເຮັດວຽກດ້ວຍຄວາມສ່ຽງເນື່ອງຈາກເປັນເໝືອງທີ່ມີຄວາມສູງ ແລະຊັນ ເຮັດໃຫ້ເກີດດິນຖະຫຼົ່ມໄດ້ງ່າຍ.
ມຽນມາເປັນແຫຼ່ງທີ່ມີເໝືອງຂະໜາດໃຫຍ່ ໂດຍມີການລາຍງານວ່າມີການຄ້າຂາຍຫິນຢົກຂອງມຽນມາທີ່ຂຸດມາຈາກເໝືອງມີມູນຄ້າຫຼາຍກວ່າ30,000 ລ້ານດອລລາ ແລະ ກໍເປັນເໝືອງທີ່ເຮັດໃຫ້ເກີດອຸບັດຕິດເຫດໃນຫຼາຍຄັ້ງເຊັ່ນກັນ