ເມື່ອວັນທີ 13 ທັນວາ ທີ່ຜ່ານມາ, ມຸນແຈອິນ ປະທານາທິບໍດີເກົາຫຼີໃຕ້ ເຜີຍວ່າ: ທາງການເກົາຫຼີໃຕ້, ເກົາຫຼີເໜືອ ລວມເຖິງອາເມລິກາ ແລະ ຈີນ ເຫັນພ້ອມໃນຫຼັກການ ກຽມປະກາດຍຸດຕິສົງຄາມເກົາຫຼີເໜືອຢ່າງເປັນທາງການ ຫຼັງຈາກທີ່ສົງຄາມເກົາຫຼີຊ່ວງປີ 1950-1953 ເປັນໜຶ່ງໃນສາເຫດສຳຄັນ ທີ່ເຮັດໃຫ້ຈຸດຢືນ ຂອງເກົາຫຼີເໜືອເປັນຝ່າຍກົງກັນຂ້າມ ກັບອາເມລິກາ ຕະຫຼອດ 70 ປີຜ່ານມາ.
ໃນສົງຄາມເກົາຫຼີຊ່ວງເວລານັ້ນ (ປີ 1953) ຢຸດຕິສົງຄາມດ້ວຍຂໍ້ຕົກລົງສະຫງົບເສິກຊ່ວງຄາວ ແລະ ຍັງບໍ່ເຄີຍມີການເຮັດສົນທິສັນຍາສັນຕິພາບແຕ່ຢ່າງໃດ ດັ່ງນັ້ນໃນທາງເທັກນິກແລ້ວຖືວ່າ ທັງເກົາຫຼີເໜືອ ແລະ ເກົາຫຼີໃຕ້ຍັງຄົງເປັນຄູ່ສົງຄາມກັນມາຕະຫຼອດ.
ຜູ້ນຳເກົາຫຼີໃຕ້ລະບຸວ່າ: ທາງການເກົາຫຼີເໜືອຈະຢຸດຕິການເປັນປໍລະປັກກັບອາເມລິກາກ່ອນ ເປັນເງື່ອນໄຂສຳຄັນ ກ່ອນທີ່ຈະເປີດທາງໄປສູ່ການເຈລະຈາຕ່າງໆໄດ້ ແລະ ຍ້ອນເຫດຜົນນີ້ ຈຶ່ງເປັນເຫດຜົນວ່າເປັນຫຍັງຍັງບໍ່ສາມາດຕັ້ງໂຕະເຈລະຈາຖະແຫຼງການ ຫຼື ເຮັດຄວາມຕົກລົງຮ່ວມກັນລະຫວ່າງທາງເກົາຫຼີໃຕ້ ແລະ ເກົາຫຼີເໜືອ ລວມເຖິງຖະແຫຼງການຮ່ວມລະຫວ່າງເກົາຫຼີເໜືອ ແລະ ອາເມລິກາໄດ້. ພ້ອມຫວັງວ່າທິດທາງຄວາມສຳພັນຂອງປະເທດຕ່າງໆ ເຫຼົ່ານີ້ຈະເປັນໄປຕາມທິດທາງທີ່ດີຂຶ້ນ.
ສຳລັບທາງການຈີນເຫັນພ້ອມຂໍ້ສະເໜີດັ່ງກ່າວ ຂະນະທີ່ເກົາຫຼີໃຕ້ ແລະ ອາເມລິກາ ຢູ່ໃນລະຫວ່າງການຮ່າງສົນທິສັນຍາສັນຕິພາບໃນຊ່ວງສຸດທ້າຍ ຂະນະທີ່ເກົາຫຼີເໜືອປະຕິເສດທີ່ຈະຮ່ວມເຈລະຈາ ຖ້າຫາກອາເມລິກາ ຍັງຄົງມີທ່າທີ ເປັນປໍລະປັກກັບເກົາຫຼີເໜືອຢູ່.
ຜ່ານມາ, ມີການຈັດຕັ້ງກອງປະຊຸມສຸດຍອດຜູ້ນຳລະຫວ່າງອາເມລິກສ ກັບເກົາຫຼີເໜືອ 3 ຄັ້ງ ໃນຊ່ວງປີ 2018-2019 ແຕ່ເບິ່ງຄືວ່າການປະຊຸມດັ່ງກ່າວບໍ່ປະສົບຜົນສຳເລັດເທົ່າທີ່ຄວນ ລວມເຖິງເກົາຫຼີເໜືອ ແລະ ເກົາຫຼີໃຕ້ 3 ຄັ້ງ ໃນປີ 2018 ທີ່ຜ່ານມາ.
ຂໍ້ມູນ: The Standard bangkokbiznews