ສຳນັກຂ່າວ ຣອຍເຕີ ລາຍງານ: ລັດຖະບານນໍເວ (Norway)ອອກຂໍ້ຫ້າມບໍ່ໃຫ້ມີການບໍລິການເຄື່ອງດື່ມທີ່ມີທາດເຫຼົ້າທຸກຊະນິດຕາມຮ້ານບັນເທີງ ແລະຮ້ານອາຫານແຫ່ງຕ່າງໆພາຍໃນປະເທດ ຫວັງສະກັດກັ້ນການແຜ່ລະບາດຂອງພະຍາດໂຄວິດສາຍພັນໂອໄມຄຣອນ.
ທ່ານ ໂຈນັສ ກາຣ໌ ສະຕໍເອເຣ, ນາຍົກລັດຖະມົນຕີນໍເວ ກ່າວວ່າ: ເປັນສິ່ງສຳຄັນ ແລະຈຳເປັນທີ່ສຸດທີ່ທຸກຄົນຈະຕ້ອງຮ່ວມມືກັນ ເພື່ອສະກັດກັ້ນການແຜ່ລະບາດຄັ້ງໃໝ່ຂອງໄວຣັສໂຄໂຣນ່າ ໂດຍສະເພາະກໍແມ່ນສາຍພັນໂອໄມຄຣອນ, ເຊິ່ງຂໍ້ຫ້າມດັ່ງກ່າວອາດຈະເຮັດໃຫ້ຫຼາຍຄົນຮູ້ສຶກຄືກັບວ່າ ກຳລັງຖືກປິດກັ້ນ ແຕ່ຈົ່ງເຂົ້າໃຈວ່າ ນີ້ແມ່ນການເສຍສະລະເພື່ອສັງຄົມ ກໍຄືເພື່ອຊີວິດຂອງພວກເຮົາເອງ.
ນອກຈາກນັ້ນ ລັດຖະບານນໍເວຍັງກຳນົດກົດເກນທີ່ເຂັ້ມງວດຂຶ້ນຕື່ມໃນບັນດາໂຮງຮຽນ ພ້ອມເລັ່ງສີດວັກຊີນ ເຊິ່ງເປັນສ່ວນໜຶ່ງຂອງຄວາມພະຍາຍາມໃໝ່ ໃນການຄວບຄຸມ ແລະສະກັດກັ້ນພະຍາດໂຄວິດສາຍພັນໂອໄມຄຣອນ.