ໂກດັງສິນຄ້າຂອງບໍລິສັດອາເມຊອນ ເຊິ່ງເປັນບໍລິສັດຍັກໃຫຍ່ຂອງສະຫະລັດອາເມລິກາ ຖືກພະຍຸທໍນາໂດພັດຖະຫຼົ່ມໃນຄໍ່າຄືນວັນທີ 10 ທັນວາ 2021 ຜ່ານມາ ເຊິ່ງໄດ້ພາກຊີວິດຜູ້ຄົນໃນໂກດັງຢ່າງໜ້ອຍ 6 ຄົນ ໄດ້ເພີ່ມຄວາມວິຕົກກັງວົນໃນກຸ່ມພະນັກງານບໍລິສັດກ່ຽວກັບການກັບມາສັ່ງຫ້າມບໍ່ໃຫ້ນຳໃຊ້ໂທລະສັບມືຖືໃນພື້ນທີ່ເຮັດວຽກ.

ເວັບໄຊ Bloom Berge ລາຍງານ: ອາເມຊອນໄດ້ອອກກົດສັ່ງຫ້າມບໍ່ໃຫ້ພະນັກງານບໍລິສັດພົກພາໂທລະສັບໃນເຂດພື້ນທີ່ຄັງສິນຄ້າມາຫຼາຍປີແລ້ວ ເຊິ່ງຄົນງານຈຳຕ້ອງວາງໂທລະສັບຂອງພວກຕົນໄວ້ໃນລົດ ຫຼື ຕູ້ເກັບເຄື່ອງພະນັກງານ ກ່ອນຈະຜ່ານການກວດສອບຄວາມປອດໄພທີ່ມີເຄື່ອງຈັບໂລຫະ ຂະນະທີ່ບໍລິສັດໄດ້ຍົກເລີກມາດຕະການດັ່ງກ່າວຊົ່ວຄາວໃນຊ່ວງທີ່ມີການລະບາດໃຫຍ່ຂອງພະຍາດໂຄວິດ-19 ກ່ອນຈະກັບມາປະກາດໃຊ້ຂໍ້ຫ້າມດັ່ງກ່າວຄືນໃໝ່ອີກຄັ້ງວ່າງບໍ່ດົນຜ່ານມານີ້.

ພະນັກງານອາເມຊອນຈຳນວນໜຶ່ງເວົ້າວ່າ ພວກເຂົາຕ້ອງການເຂົ້າເຖິງຂໍ້ມູນ ເຊັ່ນ ການອັບເດດກ່ຽວກັບເຫດການສະພາບອາກາດທີ່ເປັນອັນຕະລາຍ ຜ່ານສະມາດໂຟນຂອງພວກຕົນໂດຍປັດສາຈາກການແຊກແຊງຂອງອາເມຊອນ. ທັງນີ້ສືບເນື່ອງມາຈາກເຫດການພະຍຸທໍນາໂດພັດຖະຫຼົ່ມໂກດັງສິນຄ້າອາເມຊອນ ໃນ ເອັດເວີດສວິນ, ລັດອິນລີນອຍ ເຊິ່ງຖືກພະຍຸພັດຖະຫຼົ່ມຈົນກາຍເປັນຊາກສະຫຼັກຫັກພັງ ເຮັດໃຫ້ມີຜູ້ເສຍຊີວິດໃນໂກດັງດັ່ງກ່າວ 6 ຄົນ.

ພະນັກງານອາເມຊອນຄົນໜຶ່ງກ່າວວ່າ ໂທລະສັບຍັງສາມາດຊ່ວຍໃຫ້ພວກເຂົາເຂົ້າເຖິງໜ່ວຍກູ້ໄພສຸກເສີນ ຫຼື ຄົນທີ່ຕົນຮັກ ໃນກໍລະນີເຫດການບໍ່ຄາດຝັນເກີດຂຶ້ນ ພ້ອມຢໍ້າວ່າ ຈະລາອອກຈາກອາເມຊອນ ຫາກພວກເຂົາບໍ່ກຳນົດນະໂຍບາຍໃຫ້ໃຊ້ໂທລະສັບມືຖື.

ຢ່າງໃດກໍຕາມ, ປັດຈຸບັນ ອາເມຊອນຍັງປະຕິເສດທີ່ຈະແກ້ໄຂຂໍ້ຂ້ອງໃຈຂອງພະນັກງານຕົນເລື່ອງນະໂຍບາຍການໃຊ້ໂທລະສັບມືຖືໃນພື້ນທີ່ໂກດັງສິນຄ້າ ໂດຍກ່າວພຽງແຕ່ວ່າ “ໜ້າທີ່ສຳຄັນໃນຂະນະນີ້ຄືການເລັ່ງໃຫ້ຄວາມຊ່ວຍເຫຼືອແກ່ຜູ້ທີ່ໄດ້ຮັບຜົນກະທົບຈາກພະຍຸທໍນາໂດ ແລະສະສະໜັບສະໜູນພະນັກງານທີ່ໄດ້ຮັບຜົນກະທົບໃນພື້ນທີ່ໃຫ້ໄວທີ່ສຸດເທົ່າທີ່ຈະເຮັດໄດ້.”