ກອງກຳລັງທະຫານມຽນມາກະຈາຍກຳລັງຕໍ່ຕ້ານກຸ່ມປະທ້ວງດ້ວຍການຂັບລົດພຸ່ງຊົນເຂົ້າໃສ່ຝູງຄົນຈຳນວນຫຼາຍ ທີ່ກຳລັງເດີນຂະບວນປະທ້ວງຕໍ່ຕ້ານລັດຖະປະຫານໃນຕອນເຊົ້າວັນທີ 5 ທັນວາຜ່ານມາ ທີ່ນະຄອນຢາງກຸງ ເປັນເຫດເຮັດໃຫ້ມີຜູ້ເສຍຊີວິດ 5 ລາຍ ແລະຖືກຈັບກຸມຫຼາຍສິບຄົນ.

ຕາມການລາຍງານຂອງສຳນັກຂ່າວຣອຍເຕີ ຮູ້ວ່າ: ເກີດເຫດການປະທ້ວງໃນຕອນເຊົ້າຂອງວັນອາທິດ ທີ່ນະຄອນຢາງກຸງ ເຊິ່ງເປັນເມືອງໃຫຍ່ທີ່ສຸດຂອງມຽນມາ ເຊິ່ງກອງກຳລັງທະຫານໄດ້ໃຊ້ວິທີປາບປາມຢ່າງຮຸນແຮງ ດ້ວຍການຂັບລົດໄລ່ຕຳຝູງຊົນທີ່ກຳລັງເດີນຂະບວນປະທ້ວງ ເຮັດໃຫ້ມີຜູ້ເສຍຊີວິດຄາທີ່ຢ່າງໜ້ອຍ 5 ຄົນ ແລະບາດເຈັບອີກຫຼາຍສິບລາຍ ແລະຈຳນວນໜຶ່ງກໍຖືກຈັບກຸມ ແຕ່ໃນຕອນບ່າຍຂອງວັນດຽວກັນກໍມີການປະທ້ວງເກີດຂຶ້ນອີກຄັ້ງ ເຖິງແມ່ນຈະເກີດຄວາມຮຸນແຮງໃນຊ່ວງຕອນເຊົ້າ ກໍຕາມ.

ການປະທ້ວງຕໍ່ຕ້ານກອງທັບໃນມຽນມາຍັງຄົງດຳເນີນຕໍ່ໄປ ເຖິງແມ່ນຈະມີການສັງຫານຜູ້ຄົນຫຼາຍກວ່າ 1,300 ຄົນ ນັບແຕ່ເລີ່ມເຮັດລັດຖະປະຫານໃນວັນທີ 1 ກຸມພາ 2021 ເປັນຕົ້ນມາ ເຊິ່ງການປະທ້ວງແມ່ນມີການຈັດຕັ້ງເປັນກຸ່ມກ້ອນແບບກະແຈກກະຈາຍ ທີ່ສະແດງຄວາມເຫັນຕໍ່ຕ້ານລຶບລ້າງລັດຖະບານທີ່ມາຈາກການເລືອກຕັ້ງ ເຊິ່ງນຳພາໂດຍ ອອງຊານ ຊູຈີ ແລະການກັບມາປົກຄອງປະເທດຂອງທະຫານ.