ບໍລິສັດຜະລິດລົດຊັ້ນນຳທີ່ຢູ່ແຖວໜ້າອັນດັບໂລກຕົກລົງຈະຢຸດຕິການຜະລິດລົດທີ່ແລ່ນດ້ວຍນໍ້າມັນພາຍໃນປີ 2040 ຫຼື ອີກ 19 ປີຂ້າງໜ້ານີ້ ເພື່ອຊ່ວຍຫຼຸດຜ່ອນ ການປ່ອຍອາຍພິດກາກບອນໃນຊັ້ນບັນຍາກາດໂລກ.
ບໍລິສັດຜະລິດລົດແຖວໜ້າຂອງໂລກ ລວມມີ ບໍລິສັດ Volvo , Ford Motor , GM, MercedesBenz, ບໍລິສັດ BYD ຂອງຈີນ ແລະ ບໍລິສັດ Jaguar Land Rover ໄດ້ລົງນາມໃນຂໍ້ຕົກລົງຮ່ວມກັນ ເພື່ອຢຸດການຜະລິດລົດທີ່ໃຊ້ນ້ຳມັນ ພາຍໃນປີ 2040 ເປັນສ່ວນໜຶ່ງໃນຄວາມພະຍາຍາມຫຼຸດຜ່ອນການປ່ອຍອາຍພິດກາກບອນ ໃນຊັ້ນບັນຍາກາດໂລກ ພາຍຫຼັງມີການລາຍງານຂໍ້ມູນຈາກ ອົງການພະລັງງານສາກົນ (IEA) ໃນວັນທີ 10 ພະຈິກ 2021 ວ່າ: ລົດບັນທຸກ, ລົດໂດຍສານ ທົ່ວໄປ, ເຮືອ ແລະເຮືອບິນ ມີອັດຕາສ່ວນການປ່ອຍອາຍພິດກາກບອນ ປະມານ 1 ໃນ 4 ແລະປະລິມານອາຍພິດກາກບອນສ່ວນໃຫຍ່ມາຈາກລົດທີ່ແລ່ນຢູ່ເທິງຖະໜົນ.
ຢ່າງໃດກໍຕາມ, ທາງບໍລິສັດ Volvo ກໍຍັງໄດ້ໃຫ້ຄຳໝັ້ນສັນຍາວ່າ ຈະຜະລິດລົດຍົນທີ່ແລ່ນດ້ວຍໄຟຟ້າທົດແທນຢ່າງເຕັມຮູບແບບພາຍໃນປີ 2030.
ຂໍ້ມູນຈາກ: Lao Youth Radio