ຜະລິດຕະພັນພືດ 3 ຊະນິດ ໄດ້ແກ່ ລາຊາບີ, ຜັກຄາວທອງ ແລະ ກະຊາຍຂາວ ຈະໄດ້ຮັບການຈົດທະບຽນໃນນາມຢາພື້ນເມືອງທີ່ໃຫ້ຜົນທາງການທົດລອງດ້ານວິທະຍາສາດ ແລະ ນໍາໃຊ້ປິ່ນປົວຜູ້ຕິດເຊື້ອໂຄວິດທີ່ມີປະສິດທິພາບ, ຄຸນນະພາບ, ແລະມີຄວາມປອດໄພ ໂດຍຊ່ວຍໃຫ້ຜູ້ຕິດເຊື້ອໂຄວິດຫາຍດີ 80-100%.
ທ່ານ ດຣ ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ໃນວັນທີ 4 ພະຈິກ 2021 ວ່າ: ສະຖາບັນການແພດ- ການຢາພື້ນເມືອງ ໄດ້ຮັບມອບໝາຍໃນການຄົ້ນຄວ້າໃນ ຫ້ອງທົດລອງກວດຫາສານເຄມີສໍາຄັນຂອງພືດແຕ່ລະຊະນິດ ແລະ ຜ່ານການທົດລອງສາມາດພົບສານເຄມີສໍາຄັນຕົ້ນຕໍ ຄື: ມີສານ Andrographolide ຢູ່ໃນລາຊາບີ, ມີສານ Hyperoside ແລະ Quercetrin ຢູ່ໃນຜັກຄາວທອງ ແລະ ມີສານ Pinostrobin ແລະ Panduratin A ຢູ່ໃນກະຊາຍຂາວ ພ້ອມທັງໄດ້ເຮັດທົດລອງຜະລິດຕະພັນ 3 ຊະນິດໃສ່ກັບສັດ ເພື່ອກວດກາປະສິດທິພາບ ແລະຄວາມປອດໄພ.
“ການນໍາໃຊ້ຜະລິດຕະພັນ 3 ຊະນິດເຂົ້າໃນການປິ່ນປົວຜູ້ຕິດເຊື້ອໂຄວິດ-19 ຢູ່ແຂວງສະຫວັນນະເຂດ, ສາລະວັນ ແລະ ຈໍາປາສັກ ໃນສູນກັກບໍລິເວນຈໍານວນ 425 ກໍລະນີ ເຊິ່ງຜົນການປິ່ນປົວໃນກໍລະນີເບົາບາງ ແລະປານກາງ ແມ່ນມີອາການດີຂຶ້ນ 86-100% ສໍາລັບ ລາຊາບີ ແລະຜັກຄາວທອງ ແລະກະຊາຍຂາວ ມີປະສິດທິພາບເຖິງ 93-100%. ສ່ວນກໍລະນີທົດລອງນະຄອນຫຼວງວຽງຈັນໃນຈໍານວນ 450 ກໍລະນີ ພວມຢູ່ໃນຂັ້ນຕອນເກັບກໍາຂໍ້ມູນຕື່ມອີກ.” ລັດຖະມົນຕີ ກະຊວງສາທາລະນະສຸກກ່າວ.
ສຳລັບຄຸນປະໂຫຍດຂອງພືດ 3 ຊະນິດນີ້ ແມ່ນຊ່ວຍເສີມສ້າງພູມຄຸ້ມກັນຂອງຮ່າງກາຍ ແລະຊ່ວຍຫຼຸດຜ່ອນອາການໄອ, ໄຂ້ຫວັດໃຫຍ່, ແກ້ໄອ, ເຈັບຄໍ, ເຈັບອາມິດານ ແລະຊ່ວຍກະຕຸ້ນເຮັດໃຫ້ກິນເຂົ້າແຊບ. ສ່ວນຂໍ້ມູນທີ່ຊັດເຈນ ແມ່ນກໍາລັງດໍາເນີນການວິເຄາະຕາມຫຼັກວິຊາການຂອງສະຖາບັນສາທາລະນະສຸກສາດ ແລະ ພະຍາດເຂດຮ້ອນ, ຖ້າຜົນການສຶກສາ ສາມາດຮັບປະກັນໄດ້ດ້ານຄຸນນະພາບ, ຄວາມປອດໄພ ແລະ ມີປະສິດທິຜົນດີ ກໍຈະຈົດທະບຽນຜະລິດຕະພັນທັນທີ, ພ້ອມທັງສົມທົບກັບພາກສ່ວນກ່ຽວຂ້ອງເລັ່ງສະໜັບສະໜູນໃຫ້ແກ່ການປູກ ແລະການຜະລິດ ເພື່ອຕອບສະໜອງຄວາມຮຽກຮ້ອງຕ້ອງການໃນສະພາບການສຸກເສີນໃນປັດຈຸບັນ.
ຂໍ້ມູນຈາກ: ໜັງສືພິມ ປະເທດລາວ