ເວັບໄຊ Global Times ລາຍງານ: ລັດຖະບານຈີນໄດ້ຮ່າງແຜນດຳເນີນງານວ່າດ້ວຍການປະຢັດອາຫານ ເພື່ອສົ່ງເສີມການປະຕິບັດຕາມກົດໝາຍວ່າດ້ວຍການຕ້ານອາຫານເຫຼືອ ເຊິ່ງຖືກຮັບຮອງຢ່າງເປັນທາງການໃນເດືອນເມສາຜ່ານມາ ບົນພື້ນຖານການປ້ອງກັນປັນຫາການຂາດແຄນອາຫານໃນໂລກທີ່ອາດເກີດຂຶ້ນ.

ແຜນດຳເນີນງານດັ່ງກ່າວປະກອບມີຂໍ້ກຳນົດສະເພາະ 28 ມາດຕາ ເຊິ່ງໄດ້ຮຽກຮ້ອງໃຫ້ພາກທຸລະກິດບໍລິການຈັດງານລ້ຽງ ລວມທັງຮ້ານອາຫານຕ່າງໆເສີບອາຫານໃນປະລິມານທີ່ໜ້ອຍລົງ ພ້ອມແນະນຳລູກຄ້າໃນການສັ່ງຊື້ ແລະຕິດຕາມການສັ່ງຊື້ ແລະການບໍລິໂພກອາຫານເພື່ອຫຼີກລ້ຽງອາຫານເຫຼືອ ພ້ອມກັນນັ້ນກໍຈະມີການຈັດໝວດປະເພດອາຫານເຫຼືອເພື່ອສາມາດນຳໄປໃຊ້ຕໍ່ໄດ້ ໂດຍສະເພາະກໍແມ່ນອາຫານສັດ.

ປັດຈຸບັນລາຄາຜັກ ລວມທັງອາຫານປະເພດຕ່າງໆໃນປະເທດຈີນໄດ້ເພີ່ມສູງຂຶ້ນ ຂະນະທີ່ລາຄາອາຫານໃນທົ່ວໂລກກໍເພີ່ມຂຶ້ນເຊັ່ນກັນ ເຊິ່ງທະນາຄານໂລກລະບຸວ່າ ດັດຊະນີລາຄາສິນຄ້າກະສິກຳທົ່ວໂລກຍັງຢູ່ໃນລະດັບຄົງຕົວໃນໄຕມາດທີສາມຂອງປີນີ້ ແຕ່ກໍຍັງສູງກວ່າປີ 2020 ເຖິງ 25%.