ໃນວາລະປະກອບຄໍາເຫັນຂອງສະມາຊິກສະພາແຫ່ງຊາດ (ສສຊ) ຕໍ່ການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2021 ຂອງລັດ ຖະບານ ໃນກອງຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ດໍາເນີນໃນປັດຈຸບັນນີ້. ໜຶ່ງໃນບັນຫາພົ້ນເດັ່ນທີ່ ສສຊ ຫລາຍເຂດເລືອກ ຕັ້ງໄດ້ມີຄວາມເປັນຫ່ວງ ແລະ ຢີບຍົກຂຶ້ນມາສະເໜີໃນທີ່ປະຊຸມ ເພື່ອໃຫ້ ລັດຖະບານເບິ່ງຄືນ ກໍແມ່ນການຮຽນ-ການສອນ ໃນຮູບແບບທາງໄກ (ອອນລາຍ) ໃນໄລຍະທີ່ມີການລະບາດຂອງພະຍາດໂຄວິດ-19, ໂດຍສ່ວນ ຫລາຍເຫັນວ່າການຮຽນຜ່ານອອນລາຍ ຈະໄດ້ແຕ່ຮູບການຫຼາຍກວ່າຄຸນພາບ.
ດັ່ງຄໍາເຫັນຂອງທ່ານ ແດງ ປະທຸມທອງ ສສຊ ເຂດເລກຕັ້ງທີ 18 ແຂວງ ໄຊສົມບູນ ຍົກໃຫ້ເຫັນວ່າ: ສະພາບການຮຽນ-ການສອນ ຜ່ານອອນລາຍຄືດັ່ງ ໄດ້ປະຕິບັດໃນປັດຈຸບັນນີ້, ເຫັນວ່າຍັງບໍ່ທັນມີຄວາມເປັນເອກະພາບກັນ, ໂດຍລວມເຫັນວ່າ ໄດ້ພຽງຮູບການ, ແຕ່ຄຸນນະພາບໃນການຮັບຮູ້ເຂົ້າໃຈຂອງນັກຮຽນ ແລະ ການເອົາໃຈໃສ່ຂອງຄູອາຈານແມ່ນບໍ່ສູງ, ບໍ່ມີປະສິດທິພາບ. ຂະນະດຽວກັນ, ຂະແໜງການກ່ຽວຂ້ອງຍັງບໍ່ສາມາດສະຫລຸບໝາກຜົນ ຫຼື ປະເມີນທາງດ້ານຄຸນນະພາບຂອງການຮຽນ-ການສອນໃນຮູບແບບດັ່ງກ່າວ ໄດ້ເປັນທີ່ຊັດເຈນ, ໂດຍສະເພາະຕົວເລກຂອງອັດຕາການເຂົ້າຮຽນຂອງ ນັກຮຽນ, ຄວາມສະດວກ ແລະ ຂໍ້ຫຍຸ້ງຍາກໃນການສິດສອນລະຫວ່າງຕົວ ເມືອງກັບເຂດຊົນນະບົດຫ່າງໄກສອກຫລີກ, ຂະນະທີ່ ຍັງມີຫລາຍທ້ອງຖິ່ນ ບໍ່ທັນມີສັນຍານໂທລະສັບ ຫລື ອິນເຕີເນັດ ໄປຮອດໄປເຖິງ. ສະນັ້ນ ຂໍສະເໜີໃຫ້ລັດຖະບານ ຈົ່ງໄດ້ກວດກາ ແລະ ຊີ້ນໍາຂະແໜງການກ່ຽວຂ້ອງຕື່ມ ເພື່ອຄົ້ນຄວ້າ ແລະ ປະເມີນວ່າຄວນສືບຕໍ່ດໍາເນີນການຮຽນອອນລາຍ ຫຼື ຈະຫັນໄປນໍາໃຊ້ຮູບແບບການຮຽນວິທີອື່ນທີ່ເໝາະສົມ ເພື່ອໃຫ້ຮັບປະກັນ ທາງດ້ານຄຸນນະພາບ ແລະ ປະສິດທິພາບຂອງການສຶກສາໃຫ້ແກ່ລູກຫຼານ ຂອງພວກເຮົາໃນຕໍ່ໜ້າ.
ແນວໃດກໍຕາມ, ຄໍາເຫັນຂອງ ສສຊ ສ່ວນຫຼາຍໂດຍລວມແລ້ວເຫັນວ່າ ສອດຄ່ອງກັບການຕີລາຄາຂອງຄະນະປະຈໍາສະພາແຫ່ງຊາດ, ທີ່ສະເໜີ ໂດຍທ່ານ ສົມມາດ ພົນເສນາ ຮອງປະທານສະພາແຫ່ງຊາດ ທີ່ເຫັນວ່າການຮຽນຜ່ານລະບົບທາງໄກ ຍັງບໍ່ມີປະສິດທິຜົນເທົ່າທີ່ຄວນ, ພ້ອມທັງແນະນໍາໃຫ້ລັດຖະບານສືບຕໍ່ສ້າງ ແລະ ປັບປຸງນິຕິກໍາ ເພື່ອຄຸ້ມຄອງການຮຽນ-ການສອນແບບທາງໄກ, ພັດທະນາຫລັກສູດ ແລະ ສະໜອງອຸປະກອນການຮຽນ-ການສອນໃນທຸກຊັ້ນ, ທຸກສາຍ ເພື່ອໃຫ້ສາມາດຕອບສະໜອງໃຫ້ແກ່ການພັດທະນາຊັບພະຍາ ກອນມະນຸດໃນຍຸກ 4.0 ໃຫ້ມີຄຸນະພາບ.