ຈຸດເລີ່ມຕົ້ນທີ່ໜ້າສົນໃຈສຳລັບການຟື້ນຟູການທ່ອງທ່ຽວລາວກໍຄື ແຜນການຂອງລັດຖະບານໃນການອະນຸຍາດໃຫ້ນັກທ່ອງທ່ຽວຊາວເກົາຫຼີໃຕ້ຜູ້ທີ່ໄດ້ຮັບວັກຊິນຄົບຖ້ວນສາມາດເດີນທາງເຂົ້າປະເທດລາວ ພາຍໃຕ້ແພັກເກັດທົວກັອຟ.
ອີງຕາມການລາຍງານຂ່າວຈາກໜັງສືພິມວຽງຈັນທາຍ, ທາງກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວກຳລັງຍື່ນຄຳຂໍໃຫ້ທາງລັດຖະບານພິຈາລະນາອະນຸຍາດໃຫ້ຊາວເກົາຫຼີໃຕ້ຜູ້ທີ່ສັກວັກຊິນຄົບຖ້ວນສາມາດເດີນທາງເຂົ້າມາຫຼິ້ນກັອຟໃນນະຄອນຫຼວງວຽງຈັນໄດ້ໃນທ້າຍປີນີ້.
“ພວກເຮົາກຳລັງເຮັດວຽກຮ່ວມກັບພາກສ່ວນກ່ຽວຂ້ອງເພື່ອກຳນົດກົດລະບຽບ ແລະກຽມຄວາມພ້ອມສຳລັບນັກທ່ຽວຊາວເກົາຫຼີໃຕ້ທີ່ຈະເດີນທາງເຂົ້າມາລາວ ໂດຍສະເພາະກໍແມ່ນຜູ້ທີ່ສັກວັກຊິນຄົບ,” ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງ ຖວທ ກ່າວ.
ນັກທ່ອງທ່ຽວທີ່ຈະເດີນທາງເຂົ້າມາລາວດັ່ງກ່າວຈະຕ້ອງໄດ້ກັກຕົວໃຫ້ຄົບກຳນົດກ່ອນຈະເຂົ້າຫຼິ້ນກັອຟໄດ້ໃນສະໜາມກັອຟສອງແຫ່ງໃນນະຄອນຫຼວງວຽງຈັນ ໂດຍມີການຈັດສົ່ງດ້ວຍລົດບັສສ່ວນຕົວ ພາຍໃຕ້ການດູແລຂອງພະນັກງານນຳທ່ຽວຄົນລາວ 1 ຄົນ ແລະເກົາຫຼີໃຕ້ 1 ຄົນ. ຢ່າງໃດກໍຕາມ, ກ່ອນທີ່ນັກທ່ອງທ່ຽວກຸ່ມດັ່ງກ່າວຈະເດີນທາງເຂົ້າມາລາວກໍຕ້ອງມີໜັງສືຢັ້ງຢືນການກວດໂຄວິດ 72 ຊົ່ວໂມງ ໂດຍຈະໃຊ້ບໍລິການຖ້ຽວບິນເຊົ່າເໝົາລຳໃນການເດີນທາງໄປກັບຈາກເກົາຫຼີໃຕ້ມາລາວ ຜ່ານສາຍການບິນ Lao Airlines, Air Asia, T’way Air, ແລະ Jeju Air.