ສໍານັກຂ່າວ Channelnewsasia ລາຍງານວ່າ ອົງການສາທາລະນະສຸກຂອງຣັດເຊຍ ກ່າວໃນວັນທີ 25 ຕຸລາ 2021 ທີ່ຜ່ານມາ ວ່າກວດພົບຜູ້ຕິດເຊື້ອໂຄວິດ-19 ຈໍານວນ 37,930 ກໍລະນີ ໃນຮອບ 24 ຊົ່ວໂມງທີ່ຜ່ານມາ. ມັນໄດ້ກາຍເປັນສະຖິຕິທີ່ສູງທີ່ສຸດນັບຕັ້ງແຕ່ມີການແຜ່ລະບາດຂອງພະຍາດໂຄວິດ-19. ມີການເສຍຊີວິດເພີ່ມອີກ ຈໍານວນ 1,069 ກໍລະນີ, ເຊິ່ງສະຖິຕິສູງສຸດທີ່ເຄີຍມີ ມີພຽງແຕ່ 6 ກໍລະນີເທົ່ານັ້ນ.
ຍ້ອນວ່າຈໍານວນຜູ້ຕິດເຊື້ອທີ່ເພີ່ມຂຶ້ນ ແລະ ອັດຕາການສັກຢາທີ່ຕໍ່າ ຍ້ອນຄວາມບໍ່ໄວ້ວາງໃຈໃນວັກຊີນ Sputnik-V ທີ່ພວກເຂົາໄດ້ພັດທະນາຂຶ້ນມາເອງ ເຮັດໃຫ້ທາງການຂອງ 6 ພາກພື້ນໃນຣັດເຊຍ ລວມທັງ Samara ແລະ Perm ໄດ້ຕັດສິນໃຈໃຊ້ມາດຕະການທີ່ເຄັ່ງຄັດຂຶ້ນໃນວັນທີ 25 ຕຸລາ ທີ່ຜ່ານມາ ເພື່ອເຮັດໃຫ້ການແຜ່ລະບາດຂອງໄວຣັສຫຼຸດຜ່ອນລົງ.
ຂະນະທີ່ນັບຕັ້ງແຕ່ວັນທີ 28 ຕຸລາ ນີ້ເປັນຕົ້ນໄປ Moscow ຈະບັງຄັບໃຊ້ມາດຕະການປິດລ້ອມທີ່ເຄັ່ງຄັດທີ່ສຸດ ເຊິ່ງຈະມີພຽງແຕ່ຮ້ານຄ້າໃຫຍ່ເຊັ່ນ ຮ້ານຊຸບເປີມາເກັດ ແລະ ຮ້ານຂາຍຢາທີ່ຈະຍັງຄົງເປີດ. ທ່າມກາງການຕໍ່ຕ້ານປະຊາຊົນ Moscow ໄດ້ຕັ້ງຄໍາຖາມວ່າ ມາດຕະການນີ້ແມ່ນຖືກຕ້ອງ ຫຼື ບໍ່?
ນອກຈາກນັ້ນ, ໂຮງຮຽນທັງຫມົດໃນ Moscow ຈະຖືກປິດ, ຜູ້ທີ່ມີອາຍຸຫຼາຍກວ່າ 60 ປີ ທີ່ຍັງບໍ່ໄດ້ຮັບການສັກຢາວັກຊີນ ແມ່ນຈະໄດ້ຖືກສັ່ງໃຫ້ຢູ່ໃນເຮືອນເປັນເວລາ 4 ເດືອນເລີ່ມຕົ້ນໃນວັນທີ 25 ຕຸລານີ້ແລ້ວ, ສ່ວນ St Petersburg ເມືອງໃຫຍ່ອັນດັບສອງຂອງຣັດເຊຍໄດ້ປະກາດວ່າ ຈະບໍ່ຍົກເລີກມາດຕະການຄວບຄຸມພະຍາດໂຄວິດ-19 ຈົນກ່ວາປະຊາຊົນຢ່າງຫນ້ອຍ 80% ຈະໄດ້ຮັບວັກຊີນປ້ອງກັນຢ່າງເຕັມທີ່. ໃນປັດຈຸບັນ ທົ່ວປະເທດຣັດເຊຍ, ມີພຽງ 1/3 ເທົ່ານັ້ນທີ່ໄດ້ຮັບວັກຊີນຄົບແລ້ວ.