ສູນສື່ສານເພື່ອສຸຂະພາບ ແລະ ສຸຂະສຶກສາລາຍງານ: ລະຫັດ QR ໃນບັດຢັ້ງຢືນການຮັບວັກຊິນກັນພະຍາດໂຄວິດ-19 ມີການເປີດນຳໃຊ້ຢ່າງເປັນທາງການໃນທ້າຍອາທິດຜ່ານມາ ເຊິ່ງລະຫັດ QR ຈະເປັນບາດກ້າວສໍາຄັນໃນການຮັບປະກັນວ່າ ບັດຢັ້ງຢືນການຮັບວັກຊິນແມ່ນຂອງແທ້ ແລະສາມາດກວດສອບຜ່ານລະບົບດິຈີຕອນໄດ້.
ລະບົບດັ່ງກ່າວຖືກພັດທະນາໂດຍ ກະຊວງສາທາລະນະສຸກ, ອົງການອະນາໄມໂລກ ແລະ ຄູ່ຮ່ວມພັດທະນາ ເຊິ່ງຂໍ້ມູນສ່ວນຕົວ ແລະຂໍ້ມູນກ່ຽວກັບວັກຊິນຂອງຜູ້ທີ່ຮັບບໍລິການວັກຊິນ, ຈະຖືກບັນທຶກເຂົ້າໃນລະບົບຖານຂໍ້ມູນ ສໍາລັບວັກຊິນປ້ອງກັນພະຍາດໂຄວິດ-19, ຈາກນັ້ນ ລະຫັດ QR ຈະຖືກສ້າງຂຶ້ນ ແລະພິມໃສ່ດ້ານຫຼັງຂອງບັດຢັ້ງຢືນການຮັບວັກຊິນ ຂະນະທີ່ຜູ້ທີ່ຮັບວັກຊີນໃໝ່ຈະໄດ້ລະຫັດ QR ປາກົດໃນບັດຢັ້ງຢືນການຮັບວັກຊິນກັນພະຍາດໂຄວິດ-19, ຂະນະທີ່ບຸກຄົນທີ່ໄດ້ຮັບວັກຊິນຜ່ານມານັ້ນ ທາງພາກສ່ວນກ່ຽວຂ້ອງຈະມີການແຈ້ງໃຫ້ຮູ້ຕື່ມ.
ພິທີເປີດນໍາໃຊ້ລະຫັດ QR ໃນບັດຢັ້ງຢືນການຮັບວັກຊິນກັນພະຍາດໂຄວິດ-19 ຢ່າງເປັນທາງການ ຈັດຂຶ້ນໃນວັນທີ 22 ຕຸລາຜ່ານມາ ທີ່ນະຄອນຫຼວງວຽງຈັນ, ເຂົ້າຮ່ວມພິທີມີທ່ານ ດຣ. ພອນປະເສີດ ອຸນາພົມ, ຫົວໜ້າກົມອະນາໄມ ແລະສົ່ງເສີມສຸຂະພາບ ພ້ອມດ້ວຍຜູ້ຕາງໜ້າຈາກສູນສື່ສານເພື່ອສຸຂະພາບ ແລະ ສຸຂະສຶກສາ, ສູນສຸຂະພາບແມ່ ແລະເດັກ, ແລະອົງການອະນາໄມໂລກ.