ມາຮອດວັນທີ 28 ຕຸລາ 2014 ນີ້ ໄດ້ມີບັນດາຫົວໜ່ວຍທຸລະກິດ ແລະ ພໍ່ຄ້າຊາວຂາຍ 98% ແລ້ວ ທີ່ໄດ້ແຫ່ກັນເຂົ້າໄປຈັບ
ຈອງສະຖານທີ່ວາງສະແດງຈຳໜ່າຍ ແລະ ຂາຍສິນຄ້າ ຢູ່ພາຍໃນສະຖານທີ່ສະໜາມຫຼວງ ໃນງານປະເພນີບຸນນະມັດສະ
ການພຣະທາດຫຼວງ ປະຈຳປີ 2014 ທີ່ຈະໄດ້ຈັດຂຶ້ນລະຫວ່າງວັນທີ 31 ຕຸລາ ຫາ 6 ພະຈິກ 2014 ທີ່ຈະມາເຖິງນີ້ ເຊິ່ງປີນີ້ກໍ່
ແມ່ນບໍລິສັດ ຄຳເສັງ ຈຳກັດ ເປັນຜູ້ສຳປະທານ ແລະ ປັດຈຸບັນນີ້ ບັນຍາກາດຢູ່ພາຍໃນ ແລະ ພາຍນອກເດີ່ນສະໜາມ
ຫຼວງ ເຈົ້າຂອງຮ້ານຂາຍເຄື່ອງພວມຂຸ້ນຂ້ຽວກັນຕັ້ງຮ້ານຂາຍເຄື່ອງ ສ່ວນບໍລິສັດຜູ້ສຳປະທານກໍ່ໄດ້ຕິດຕັ້ງເຕັ້ນ ຕັ້ງຮ້ານ
ຂາຍເຄື່ອງ ສ້າງຫ້ອງການເຮັດວຽກຂອງຄະນະກຳມະການ ຕິດຕັ້ງໄຟຟ້າ ນ້ຳປະປາ ແລະ ອື່ນໆ ຢ່າງເປັນຂະບວນຟົດຟື້ນ
ສຳເລັດເປັນສ່ວນຫຼາຍແລ້ວ ແລະ ຄາດວ່າຈະໃຫ້ສຳເລັດກ່ອນມື້ເປີດງານຢ່າງເປັນທາງການ ວັນທີ 31 ຕຸລາ 2014.
ທ່ານ ຄຳເສັງ ສູນດາລາ ຜູ້ອຳນວຍການບໍລິສັດ ຄຳເສັງ ຈຳກັດ (KSL) ໄດ້ກ່າວວ່າ: ພາຍຫຼັງສຳເລັດການສຳປະທານງານ
ບຸນປະເພນີອອກພັນສາປະວໍລະນາ ແລະ ຊ່ວງເຮືອທ່າວັດຈັນ ປະຈຳປີ 2014 ແລ້ວ ທາງບໍລິສັດພວກເຮົາ ກໍ່ໄດ້ສືບຕໍ່ສຳ
ປະທານງານບຸນນະມັດສະການພຣະທາດຫຼວງ ປະຈຳປີ 2014 ຕໍ່ ເຊິ່ງປີນີ້ເປັນປີທີ 7 ທີ່ທາງບໍລິສັດໄດ້ຮັບສຳປະທານ ພາຍ
ຫຼັງໄດ້ຮັບການມອບໝາຍວຽກດັ່ງກ່າວຈາກນະຄອນຫຼວງ ກໍ່ຄືຄະນະກຳມະການຈັດງານບຸນ ບໍລິສັດກໍ່ໄດ້ເປີດໂອກາດໃຫ້
ບັນດາຫົວໜ່ວຍທຸລະກິດ ແລະ ຊາວຄ້າຂາຍ ມາຈັບຈອງສະຖານທີ່ຂາຍເຄື່ອງຢ່າງເປັນຂະບວນການຟົດຟື້ນ ແລະ ເຫັນ
ວ່າປີນີ້ ບັນດາຫົວໜ່ວຍທຸລະກິດແມ່ນໄດ້ເຂົ້າມາແຕ່ເຊົ້າ ແລະ ລຽນຄິວຈັບຈອງກັນຍາວເປັນແຖວ ອັນໄດ້ເຮັດໃຫ້ຫາງ
ສຽງທາງນອກສ້າງຄວາມປັ່ນປ່ວນວ່າມີການຍາດຊິງກັນຊາວຄ້າຂາຍພາຍໃນ ແລະ ຕ່າງປະເທດຈັບຈອງ ເກີດມີຄວາມ
ວຸ້ນວາຍຜິດຖຽງກັນຂຶ້ນ ແທ້ຈິງແລ້ວແມ່ນບໍ່ມີຄວາມເປັນຈິງແຕ່ຢ່າງໃດ ມັນເປັນພຽງແຕ່ຄວາມຟົດຟື້ນຕື່ນຕົວຂອງ
ຊາວຄ້າຂາຍ ທີ່ພາກັນແຫ່ກັນມາຈັບຈອງບາດດຽວ ເຮັດໃຫ້ມີຈຳນວນຄົນຫຼວງຫຼາຍ ເຊິ່ງຜູ້ສຳປະທານ ກໍ່ໄດ້ມີຄວາມຍຸຕິ
ທຳ ໄດ້ຈັດແບ່ງໄປຕາມການຈັດສັນຂອງຄະນະກຳມະການຈັດງານ ບໍ່ເຂົ້າຂ້າງອອກໃຜ ເຮັດໃຫ້ການຈັບຈອງດຳເນີນໄປໄດ້
ດີ ແລະ ປັດຈຸບັນກໍ່ມີຜູ້ມາຈັບຈອງເປັນຈຳນວນຫຼວງຫຼາຍ ຄາດວ່າປີນີ້ຈະມີ 300 ກວ່າຮ້ານ (ບູດ) ທາງບໍລິສັດ ໄດ້ຈັດສັນ
ສະຖານທີ່ຄືກັບປີຜ່ານມາ ຄືຢູ່ຂອບເຂດໃຈກາງເດີ່ນສະໜາມຫຼວງໃຫ້ວາງສະແດງ ແລະ ຂາຍຜະລິດຕະພັນພາຍໃນທີ່ເປັນ
ຫັດຖະກຳ ແລະອຸດສາຫະກຳ ປະມານ 100 ຮ້ານ ພ້ອມທັງມີນະໂຍບາຍຫຼຸດຄ່າເຊົ່າ 30% ເພື່ອເປັນການສົ່ງເສີມຜະລິດຕະ
ພັນພາຍໃນ ນອກນີ້ຍັງມີສິນຄ້າໂອດອບຂອງບັນດາແຂວງ ເມືອງ ແລະ ຮ້ານວາງສະແດງຂອງບັນດາສຳນັກງານອົງການ
ແລະ ສະຖານທູດ ທາງບໍລິສັດ ໄດ້ຈັດສັນຢູ່ເຂດເດີ່ນກົມມະລຽນ ດ້ານເບື້ອງຕາເວັນອອກຂອງພຣະທາດຫຼວງ.
ສ່ວນວ່າການສຳປະທານຝາກລົດ ແລະ ການຂາຍເຄື່ອງຢູ່ດ້ານນອກເດີ່ນສະໜາມຫຼວງ ທາງບໍລິສັດສຳປະທານ ແມ່ນໄດ້
ມອບຄວາມຮັບຜິດຊອບໃຫ້ທາງອຳນາດການປົກຄອງເມືອງ ແລະ ບ້ານອ້ອມຂ້າງ 9 ບ້ານ ເປັນຜູ້ຄຸ້ມຄອງຄວາມເປັນລະ
ບຽບຮຽບຮ້ອຍ ວຽກງານປ້ອງກັນ ແລະ ການເກັບລາຍຮັບຄ່າບໍລິການຕ່າງໆ ບໍ່ວ່າຈະເປັນການຂາຍເຄື່ອງ ແລະ ການຝາກ
ລົດ ຖືວ່າທຸກຢ່າງເມືອງ ແລະ ບ້ານເປັນຜູ້ເກັບເອົາເອງ ທັງນີ້ ທາງຜູ້ສຳປະທານຈະບໍ່ໄດ້ຫຍຸ້ງກ່ຽວ ເຊິ່ງຜ່ານມາ ມີບາງຄົນ
ເຂົ້າໃຈວ່າບໍລິສັດຜູ້ສຳປະທານເປັນຜູ້ເກັບຄ່າບໍລິການທັງ ໝົດພາຍໃນງານ ຄວາມຈິງແລ້ວແມ່ນເຂົ້າໃຈຜິດ ຜູ້ສຳປະທານ
ພຽງແຕ່ເກັບຄ່າບໍລິການນຳຜູ້ທີ່ຈັບຈອງ ຢູ່ໃນພາຍໃນເດີ່ນສະໜາມຫຼວງເທົ່ານັ້ນ.
ສຳລັບຄ່າບໍລິການຝາກລົດຢູ່ໃນງານບຸນປີນີ້ ລົດຖີບ 3.000 ກີບ ລົດຈັກ 5.000 ກີບ ລົດຕຸກໆຈຳໂບ້ 10.000 ກີບ ແລະ ລົດ
ໃຫຍ່ 15.000 ກີບຕໍ່ຄັນຕໍ່ຄັ້ງ ຖ້າຫາກບຸກຄົນໃດຫາກສວຍໂອກາດຂຶ້ນລາຄາຄ່າບໍລິການຝາກລົດ ແມ່ນມອບໃຫ້ເມືອງ
ແລະ ບ້ານເປັນຜູ້ຮັບຜິດຊອບ ນອກນີ້ ທາງບໍລິສັດສຳປະທານຍັງໄດ້ເນັ້ນຄວາມສະອາດພາຍໃນງານບຸນ ໂດຍໄດ້ສົມທົບ
ກັບ ອພບ ເຮັດອະນາໄມທຸກໆມື້ ພ້ອມທັງຈັດຊື້ຖົງຢາງແຈກຢາຍໃຫ້ແຕ່ລະຮ້ານຂາຍເຄື່ອງ ທັງນີ້ ກໍ່ເພື່ອເປັນບ່ອນເກັບ
ມ້ຽນຂີ້ເຫຍື້ອບໍ່ໃຫ້ຖິ້ມຊະຊາຍທົ່ວໄປ.
ແຫລ່ງຂ່າວ: ວຽງຈັນໃໝ່