ສາດສະດາຈານ ດຣ ມາຍຟອງ ມາຍຊາຍ ຮອງປະທານມະຫາວິທະຍາໄລວິທະຍາສາດສຸຂະພາບ ແມ່ນ 1 ໃນ 12 ຄົນຈາກອາຊີທີ່ຈະໄດ້ຮັບລາງວັນ ຈາກງານ Asia Innovation Awards ທີ່ຢູ່ໃນກຸ່ມລາງວັນຂອງ Hitachi Global Foundation Asia Innovation Award 2020 ຂະແໜງລາງວັນທີ່ໄດ້ຮັບ ແມ່ນຈາກສາຂາ ສຸຂະພາບ ໂດຍຫົວຂໍ້ບົດວິໄຈ ກ່ຽວກັບ“Research of Mass Drug Administration with “Dihydroartemisinin-piperaquine (DP) + primaquine (PQ) for Malaria Elimination” ເຊິ່ງແມ່ນການສຶກສາຮ່ວມ ລະຫວ່າງ Lao-Oxford-Mahosot Hospital-Wellcome Trust Research Unit or LOMWRU ຢູ່ໂຮງໝໍມະໂຫສົດ ແລະ the Mahidol-Oxford Research Unit.
ທ່ານ ສຈ ປອ ດຣ ມາຍຟອງ ໃຫ້ສໍາພາດ ກັບໜັງສືພິມ ວຽງຈັນທາມວ່າ “ຜົນງານການວິໄຈນີ້ ຈະປະກອບສ່ວນ ບັນລຸເປົ້າໝາຍການພັດທະນາແບບຍືນຍົງ SDG ລວມມີ ການຫຼຸດພົ້ນ ຈາກຄວາມທຸກຍາກ ຫິວໂຫຍ, ປັບປຸງສຸຂະພາບ ແລະ ການດໍາລົງຊີວິດ, ແລະ ຮັບປະກັນ ການສຶກສາທີ່ມີຄຸນນະພາບ. ຈາກຜົນການສຶກສາຄົ້ນຄວ້າ, ພວກເຮົາຈະສາມາດ ກໍາຈັດ ໄຂ້ມາຣາເລຍ ໃຫ້ໝົດໄປ ຈາກ ສປປ ລາວ, ຈາກອາຊຽນ ແລະ ໃນຂົງເຂດອື່ນໆ ພາຍໃນປີ 2030. ລາງວັນດັ່ງກ່າວ ບໍ່ພຽງແຕ່ສົ່ງເສີມໃຫ້ຂ້ອຍດໍາເນີນການຄົ້ນຄ້ວາຕໍ່ໄປເພື່ອເປັນປະໂຫຍດຕໍ່ສຸຂະພາບຂອງປະຊາຊົນລາວເທົ່ານັ້ນ ແຕ່ຫວັງວ່າຈະເປັນແຮງບັນດານໃຈໃຫ້ໄວໜຸ່ມລາວ ຫັນມາສົນໃຈວຽກງານການຄົ້ນຄວ້າ” ທ່ານ ດຣ ມາຍຟອງກ່າວ
ໃນແຕ່ລະປີ ໄຂ້ມາຣາເລຍ ມີຜົນກະທົບຕໍ່ຄົນ ປະມານ 200 ລ້ານຄົນ ແລະ ມີຜູ້ເສຍຊີວິດ ຈາກໄຂ້ ມາຣາເລຍ ປະມານ 400.000 ຄົນຕໍ່ປີ ໃນທົ່ວໂລກ.
ໂຄງການ Asia Innovation Awards ໄດ້ຖືກເປີດຕົວໃນປີ 2020 ເພື່ອສົ່ງເສີມທາງດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາທີ່ປະກອບສ່ວນເຂົ້າໃນການແກ້ໄຂບັນຫາສັງຄົມ ແລະ ສ້າງສັງຄົມທີ່ຍືນຍົງຢູ່ໃນພາກພື້ນອາຊຽນ.