ພາຍຫຼັງມີການຊີ້ແຈງຈາກກອງປະກວດ Miss Universe Laos ໃນວັນທີ 24 ສິງຫາຜ່ານມາ ເລື່ອງການຕັດສິນໃຈທີ່ຈະບໍ່ສົ່ງນາງງາມລາວເຂົ້າຮ່ວມປະກວດໃນເວທີລະດັບໂລກຄັ້ງທີ 70 ທີ່ຈະຈັດຂຶ້ນໃນເດືອນທັນວາ 2021 ທີ່ປະເທດອິສະຣາເອວ ເນື່ອງຈາກສະຖານະການຂອງພະຍາດໂຄວິດ-19 ເຊິ່ງສົ່ງຜົນໃຫ້ການເດີນທາງໄລຍະນີ້ມີຂີດຈຳກັດ ເຮັດໃຫ້ບັນດາແຟນໆຕ່າງກໍເສົ້າໃຈ ແລະເສຍດາຍໂອກາດດີໆຄັ້ງນີ້.

ຫຼ້າສຸດ, ກໍມີຂ່າວໃຫ້ແຟນໆໄດ້ຊື່ນຊົມອີກຄັ້ງ ເມື່ອເພດຈ໌ Miss Universe Laos ໄດ້ເປີດຮັບສະໝັກບັນດາສາວງາມທີ່ມີຄຸນສົມບັດເໝາະສົມ ຂະນະທີ່ມື້ນີ້ກໍເປັນມື້ສຸດທ້າຍແລ້ວສຳລັບການເປີດຮັບສະໝັກສາວງາມດັ່ງກ່າວເພື່ອເຂົ້າປະກວດ ມິສຢູນິເວີຣສລາວ 2021 ຄັ້ງທີ 3 ເຊິ່ງງານແຂ່ງຂັນຈະໄດ້ຈັດຂຶ້ນໃນທ້າຍເດືອນນີ້.

ທີມງານລາວໂພສໄດ້ສອບຖາມທາງກອງປະກວດ ເຊິ່ງກໍໄດ້ຮັບຄຳຕອບວ່າ: ທາງທີມງານໄດ້ກຽມຈັດປະກວດເພື່ອຄັດເລືອກໜຶ່ງສາວງາມຜູ້ທີ່ມີຄຸນສົມບັດພຽບພ້ອມທີ່ຈະເດີນທາງໄປປະຊັນຄວາມຄວາມງາມໃນເວທີລະດັບໂລກ ທີ່ຈະຈັດຂຶ້ນຢູ່ປະເທດອິດສະລາເອວໃນເດືອນທັນວາປີນີ້ ແຕ່ກໍຍັງຢູ່ໃນລະຫວ່າງລໍຖ້າການຢືນຢັນອີກຄັ້ງຈາກກອງປະກວດໃຫຍ່ເຊັ່ນ Miss Universe Organization ຈາກສະຫະລັດອາເມລິກາ, ພ້ອມຮຽກຮ້ອງໃຫ້ບັນດາແຟນໆສາມາດຕິດຕາມເພດຈ໌ຂອງກອງປະກວດໄດ້ຕະຫຼອດເວລາ ເພາະຈະມີການອັບເດດຂໍ້ມູນເປັນປະຈຳ.