ຕາມການລາຍງານຂອງເພຈ ປ້ອງກັນຄວາມສະຫງົບນະຄອນຫຼວງວຽງຈັນ ລາຍງານວ່າ ເວລາປະມານ 23:30 ໂມງ ຂອງວັນທີ 04 ຕຸລາ 2021 ປກສ ກຸ່ມເພຍວັດ ສົມທົບກັບກອງພັນປ້ອງກັນເຄື່ອນທີ່ ປກສ ນວ ແລະ ກອງບັນຊາການ ປ້ອງກັນເຄື່ອນທີ່ ກະຊວງ ປກສ ແລະ ພາກສ່ວນທີ່ກ່ຽວຂ້ອງ ເຂົ້າແກ້ໄຂກຸ່ມໄວລຸ້ນມົ້ວສຸມເສບຢາເສບຕິດ ແລະ ດື່ມເຫຼົ້າ, ເບຍ ທີ່ລະເມີດຕໍ່ແຈ້ງການ 37/ຈນວ ລົງວັນທີ 30 ກັນຍາ 2021 ຢູ່ໂຮງແຮມໂຄ້ງຄຳ ຈຳນວນ 32 ຄົນ, ຍິງ 13 ຄົນ, ຢຶດປືນສັ້ນ 03 ກະບອກ ພ້ອມລູກກະສູນ 40 ລູກ ແລະ ຢາໄອຈໍານວນ 14 ຖົງນ້ອຍ ສ່ົງໃຫ້ກອງພັນປ້ອງກັນເຄື່ອນທີ່ ປກສ ນວ ແລະ ກອງບັນຊາການ ປ້ອງກັນເຄືື່ອນທີ່ ກະຊວງ ປກສ ແກ້ໄຂ.
ຜ່ານການກວດກາພົບເຫັນມີການມົ້ວສຸມສີ່ງເສບຕິດປະເພດຢາໄອ ແລະ ດື່ມເບຍ ຢູ່ 2 ຫ້ອງຄື: ຫ້ອງທີ 1 ພົບເຫັນໄວລຸ້ນ ຈຳນວນ 8 ຄົນ, ຍິງ 2 ຄົນ ພ້ອມຂອງກາງຄະດີມີ: ປືນສັ້ນ 03 ກະບອກ, ລູກກະສູນ 40 ລູກ ແລະ ຢາໄອ ຈໍານວນ 14 ຖົງນ້ອຍ, ຫ້ອງທີ 2 ພົບເຫັນໄວລຸ້ນ ຈຳນວນ 24 ຄົນ, ຍີງ 11ຄົນ, ເປັນຄົນຈີນ 13 ຄົນ ດື່ມເຫຼົ້າເບຍ ແລະ ມີຢາໄອໄວ້ຄອບຄອງ ຈຳນວນ 05 ຖົງນ້ອຍ, ຈິ່ງໄດ້ເຂົ້າຄຸມຕົວພວກກ່ຽວ ແລ້ວນໍາສົ່ງໃຫ້ກອງພັນປ້ອງກັນເຄື່ອນທີ່ ປກສ ນວ ແລະ ກອງບັນຊາການ ປ້ອງກັນເຄືື່ອນທີ່ ກະຊວງ ປກສ ສອບສວນເບື້ອງຕົ້ນ ແລະ ນຳຕົວພວກກ່ຽວໄປກັກກັນ ໃຫ້ຄົບ 14 ວັນ ຕາມມາດຕະການປ້ອງກັນພະຍາດໂຄວິດ ແລະ ເພື່ອກວດຫາເຊື້ອພະຍາດ, ຫຼັງຈາກຄົບກໍານົດຈິ່ງຈະນຳຕົວມາດຳເນີນຄະດີ ຕາມລະບຽບກົດໝາຍ; ການກັກຕົວຄັ້ງນີ້ ພວກກ່ຽວຈະໄດ້ຮັບຜິດຊອບຄ່າໃຊ້ຈ່າຍການກິນຢູ່ເອງທັງໝົດ ເພາະເປັນການກະທໍາໂດຍເຈດຕະນາ.
ກອງບັນຊາການ ປກສ ນວ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ແລະ ທຸກຄົນໃນສັງຄົມ ໃຫ້ເຂັ້ມງວດປະຕິບັດມາດຕະການປ້ອງກັນ, ຄວບຄຸ້ມ ການແຜ່ລະບາດພະຍາດ ຖ້າພົບເຫັນເຈົ້າຂອງຫົວໜ່ວຍທຸລະກິດ ຍັງເມີນເສີຍ, ປະມາດຂາດສະຕິ, ບໍ່ເຄົາລົບກົດໝາຍ, ຄໍາສັ່ງ ແລະ ແຈ້ງການ ໃນການຄວບຄຸ້ມການແຜ່ລະບາດພະຍາດ ຈະຖືກນໍາໃຊ້ມາດຕະການ ໂດຍບໍ່ມີຂໍ້ຍົກເວັ້ນ, ສ່ວນຜູ້ໄປມົ້ວສຸມ, ຊຸມແຊວ ຫຼື ກະທໍາຜິດກົດໝາຍ ກໍຖືກນຳຕົວໄປກັກກັນ ພ້ອມທັງຮັບຜິດຊອບໃນການໃຊ້ຈ່າຍ, ຢູ່ກິນພັກເຊົາ ແລະ ປິ່ນປົວດ້ວຍຕົນເອງ ຖ້າພົບເຫັນຫົວໜ່ວຍທຸລະກິດໃດ ຍັງລະເມີດຕໍ່ແຈ້ງການ, ຄໍາສັ່ງ ສາມາດແຈ້ງ ມາເບີວ໋ອດແອບ 020: 28879 9774 ຫຼື ທາງເຟັສບຸກ ປກສ ນວ.