ເວັບໄຊໄທຣັສອອນໄລນ໌ລາຍງານ: ຈາກປະເດັນທີ່ສາມປະເທດຍັກໃຫຍ່ເຊັ່ນ ສະຫະລັດອາເມລິກາ, ສະຫະຣາຊະອານາຈັກອັງກິດ ແລະ ອົດສະຕາລີ ຈັບມືກັນດ້ານສົນທິສັນຍາຄວາມໝັ້ນຄົງ “AUKUS” ບວກກັບເລື່ອງການຈີກສັນຍາເຮືອດຳນໍ້າ ໄດ້ກະຕຸ້ນຕ່ອມໂມໂຫໃຫ້ແກ່ຝຣັ່ງເສດຈົນຕ້ອງຂໍຖອນຕົວອອກຈາກການເຈລະຈາດ້ານຄວາມໝັ້ນຄົງກັບອັງກິດ ທີ່ກຸງລອນດອນໃນອາທິດຜ່ານມາ.

ພາຍໃຕ້ຂໍ້ຕົກລົງສົນທິສັນຍາຄວາມໝັ້ນຄົງ “AUKUS” ມີຄວາມກ່ຽວຂ້ອງກັບຝຣັ່ງເສດ ເນື່ອງຈາກທາງການສະຫະລັດອາເມລິກາຈະຊ່ວຍເຮືອດຳນໍ້າພະລັງງານນິວເຄຼຍລຳທຳອິດໃຫ້ແກ່ອົດສະຕາລີ ເຊິ່ງຖືເປັນການຈີກສັນຍາທີ່ອົດສະຕາລີເຄີຍຕົກລົງເລື່ອງຈະຊື້ເຮືອດຳນໍ້າຈາກຝຣັ່ງເສດຈຳນວນ 12 ລຳກ່ອນໜ້ານີ້ ຂະນະທີ່ໃນຊ່ວງອາທິດຜ່ານມາ ລັດຖະບານຝຣັ່ງເສດກໍໄດ້ຕອບໂຕ້ສະຫະລັດອາເມລິກາ ແລະອົດສະຕາລີ ດ້ວຍການຮຽກຕົວເອກອັກຄະຣາຊະທູດຝຣັ່ງເສດ ປະຈຳກຸງວໍຊິງຕັນ ດີ.ຊີ ແລະ ກຸງແຄນເບີຣາ ກັບຄືນປະເທດ ເຊິ່ງຖືເປັນມາດຕະການຕອບໂຕ້ທາງການທູດທີ່ບໍ່ເຄີຍມີມາກ່ອນຂອງຊາດທີ່ເປັນພັນທະມິດກັນ.

ຢ່າງໃດກໍຕາມ, ເຖິງແມ່ນນາຍົກລັດຖະມົນຕີຂອງອັງກິດຈະພະຍາຍາມອະທິບາຍເຖິງຂໍ້ດີໃນສົນທິສັນຍາດ້ານຄວາມໝັ້ນຄົງໃນພາກພື້ນອາຊີ-ປາຊີຟິກ “AUKUS” ເພື່ອຫວັງຫຼຸດຜ່ອນຂໍ້ກັງວົນບາງປະການແກ່ຝຣັ່ງເສດ ສຸດທ້າຍກໍບໍ່ສາມາດຮັກສາປະເທດພັນທະມິດນີ້ໄວ້ໄດ້.