ຄະນະສະເພາະກິດນະຄອນຫຼວງວຽງຈັນ ໄດ້ອອກແຈ້ງການກ່ຽວກັບການເພີ່ມທະວີ ຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດ ໂຄວິດ – 19 ຢູ່ ນະຄອນຫຼວງວຽງຈັນ ໃນໄລຍະວັນທີ 16 – 30 ກັນຍາ 2021 ເຊິ່ງຜູ້ເດີນທາງມາຈາກສາມແຂວງພາກໃຕ້ ແລະ ບໍ່ແກ້ວຕ້ອງກັກໂຕ 14 ວັນ.
ຫ້າມບຸກຄົນຢູ່ແຂວງທີ່ມີການລະບາດໃນຊຸມຊົນ ລະດັບ 2 ແລະ 3 ເດີນທາງເຂົ້າມານະຄອນຫຼວງວຽງຈັນ ເຊັ່ນ ແຂວງຈຳປາສັກ, ສະຫວັນນະເຂດ, ຄຳມ່ວນ, ແລະ ບໍ່ແກ້ວ ທັງຫ້າມບຸກຄົນທີ່ອາໄສຢູ່ນະຄອນຫຼວງວຽງຈັນ ເດີນທາງໄປແຂວງດັ່ງກ່າວ, ກໍລະນີຈຳເປັນ ຕ້ອງໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ, ແຕ່ເມື່ອມາຮອດນະຄອນຫຼວງວຽງຈັນ ຕ້ອງຈຳກັດບໍລິເວນຕົນເອງໃຫ້ຄົບ 14 ວັນ ຢູ່ສະຖານທີ່ຈຳກັດບໍລິເວນ ທີ່ຄະນະສະເພາະກິດ ນະຄອນຫຼວງວຽງຈັນຈັດໄວ້.
ນອກນັ້ນກໍຍັງຫ້າມຜູ້ທີ່ຕິດເຊື້ອພະຍາດ ໂຄວິດ-19 ລວມທັງ ຜູ້ທີ່ສຳຜັດໃກ້ຊິດກັບຜູ້ຕິດເຊື້ອພະຍາດດັ່ງກ່າວ ປິດອຳ ຫຼື ຕົວະປະຫວັດການເຄື່ອນໄຫວຂອງຕົນ ແລະ ຫຼົບໜີການເຂົ້າປິ່ນປົວຢູ່ໂຮງໝໍ ຫຼື ບໍ່ຈຳກັດບໍລິເວນຕົນເອງຢູ່ສະຖານທີ່ຈຳກັດບໍລິເວນທີ່ທາງຄະນະສະເພາະກິດຈັດໄວ້ໃຫ້ ແມ່ນຈະຖືກປັບໄໝ ແລະ ດຳເນີນຄະດີ ຕາມລະບຽບກົດໝາຍ ລວມທັງໃຫ້ຮັບຜິດຊອບຕໍ່ຄວາມເສຍຫາຍທີ່ກໍ່ຂຶ້ນທັງໝົດ.
ຂໍ້ມູນຈາກ: Lao Youth Radio