ກະຊວງສາທາລະສຸກເຕືອນປະຊາຊົນທົ່ວປະເທດໃຫ້ເພີ່ມຄວາມລະມັດລະວັງໃນການປ້ອງກັນຕົນເອງຈາກພະຍາດໂຄວິດ-19 ເນື່ອງຈາກປັດຈຸບັນ ຫຼາຍແຂວງໃນລາວຍັງມີການລະບາດຢູ່ໃນລະດັບ 2 ພ້ອມມີທ່າອ່ຽງທີ່ຈະກ້າວໄປຫາລະດັບ 3 ນັ້ນກໍ່ຄື ລະດັບສູງສຸດ.

ທ່ານ ດຣ. ລັດສະໝີ ວົງຄໍາຊາວ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວໃນມື້ວານນີ້ວ່າ: ທ່າອ່ຽງການລະບາດຂອງພະຍາດໂຄວິດ-19 ໃນທົ່ວໂລກ ລວມທັງ ສປປ ລາວ ແມ່ນຍັງບໍ່ທັນເປັນທີ່ໄວ້ວາງໃຈ, ຫຼາຍແຂວງ ມີການລະບາດຢູ່ໃນລະດັບ 2 ພ້ອມມີທ່າອ່ຽງທີ່ຈະກ້າວໄປຫາລະດັບ 3 ນັ້ນກໍ່ຄື ລະດັບສູງສຸດ.

ສຳລັບການຈັດລະດັບຂອງການແຜ່ລະບາດ ປະກອບມີ: ລະດັບ ສູນ, ລະດັບ 1, ລະດັບ 2 ແລະ ລະດັບ 3. ໃນນັ້ນ, ລະດັບສູນ ແມ່ນບໍ່ມີສັນຍານການຕິດເຊື້ອທັງໃນຊຸມຊົນ ແລະ ນຳເຂົ້າເປັນເວລາ 28 ວັນ, ລະດັບ 1 ແມ່ນມີສະເພາະກໍລະນີນຳເຂົ້າ ໂດຍບໍ່ມີການລະບາດໃນຊຸມຊົນ, ລະດັບ 2 ໝາຍເຖິງການລະບາດໃນຊຸມຊົນໃດໜຶ່ງ ແຕ່ບໍ່ເປັນບໍລິເວນກວ້າງ ດັ່ງທີ່ກຳລັງລະບາດໃນລາວຂະນະນີ້, ສ່ວນລະດັບ 3 ເປັນການລະບາດໃນຊຸມຊົນທີ່ເປັນວົງກວ້າງ ພ້ອມທັງມີການລະບາດຢ່າງຕໍ່ເນື່ອງ.