ເວັບໄຊ້ Khaosod ໄດ້ລາຍງານວ່າໃນທ້າຍເດືອນສິງຫາທີ່ຜ່ານມາສະຖານີຕໍາຫຼວດໃນເມືອງຫຼຽນຢຸນກັງ ມົນທົນ ຈຽງຊູ ປະເທດຈີນ ໄດ້ຮັບແຈ້ງຈາກພົນລະເມືອງດີຄົນໜຶ່ງວ່າມີຮ້ານອາຫານແຫ່ງໜຶ່ງໄດ້ໃຊ້ສ່ວນປະສົມທີ່ຜິດກົດໝາຍໃສ່ໃນອາຫານ.
ໂດຍພົນລະເມືອງດີທີ່ໄດ້ແຈ້ງກັບຕໍາຫຼວດກ່າວວ່າ: ເຂົາໄດ້ເຫັນວິດີໂອກ່ຽວກັບການເຕືອນໄພຂອງພໍ່ຄ້າບາງຄົນໃນສື່ອອນລາຍທີ່ລັກໃສ່ດອກຝິ່ນໃນອາຫານເຮັດໃຫ້ອາຫານແຊບຂຶ້ນ ແລະ ໂຕເຂົາເອງມີຮ້ານອາຫານຮ້ານປະຈໍາທີ່ມັກຢູ່ຮ້ານໜຶ່ງ ເຂົາເລີຍຄິດວ່າຮ້ານທີ່ເຂົາມັກນັ້ນຈະປະສົມຜົງຝິ່ນລົງໄປໃນອາຫານຫຼືບໍ່ ເຂົາຈຶ່ງໄດ້ແຈ້ງຕໍາຫຼວດເພື່ອໄປກວດສອບ ຜົນປາກົດວ່າ ຮ້ານອາຫານດັ່ງກ່າວໄດ້ປະສົມຜົງຝິ່ນ ແລະ ສານອື່ນໆໃສ່ໃນອາຫານ. ດັ່ງນັ້ນ, ທາງຕໍາຫຼວດຈຶ່ງໄດ້ປະສານໄປຫາອົງກອນການອາຫານ ແລະ ຢາ ເພື່ອເພື່ອມາກວດຄົ້ນຮ້ານດັ່ງກ່າວ.
ທາງດ້ານເຈົ້າຂອງຮ້ານໄດ້ຍອມຮັບສາລະພາບວ່າໄດ້ໃສ່ຜົງຝິ່ນລົງໄປໃນອາຫານ ໂດຍມີຂໍ້ອ້າງວ່າຕົນເອງບໍ່ມີທາງເລືອກ ແລະ ມັນເປັນຫົນທາງດຽວທີ່ຈະເຮັດໃຫ້ກັບມາຂາຍດີອີກຄັ້ງ ຫຼັງຈາກໃສ່ຝິ່ນໃນອາຫານ ກໍເຮັດໃຫ້ຮ້ານມາຂາຍດີອີກຄັ້ງໜຶ່ງ ແລະ ມີລູກຄ້າເພີ່ມຂຶ້ນເລື້ອຍໆ ຈົນສຸດທ້າຍຕໍາຫຼວດກໍໄດ້ເຂົ້າມາຈັບກຸມ ແລະ ກໍາລັງຢູ່ໃນຂັ້ນຕອນການດໍາເນີນຄະດີ.