ເວັບໄຊ USA Today ລາຍງານ: ເກີດເຫດກຸ່ມໂຈນເຂົ້າປຸ້ນທະນາຄານສອງແຫ່ງຢູ່ເຂດພາກຕາເວັນອອກໃຕ້ຂອງເຊົາເປົາໂລ, ປະເທດບຣາຊິລ ເຊິ່ງໂຈນກຸ່ມນີ້ໄດ້ເອົາຕົວຫຼົບໜີພ້ອມຈັບຕົວປະກັນສາມຄົນມາຜູກຕິດກັບຝາກະໂປງລົດຫວັງໃຊ້ເປັນເກາະປ້ອງກັນກະສຸນລູກປືນຈາກເຈົ້າໜ້າທີ່.
ນອກຈາກປຸ້ນທະນາຄານແລ້ວ ກຸ່ມໂຈນດັ່ງກ່າວຍັງໄດ້ຈູດຊະນວນລະເບີດທົ່ວເມືອງທີ່ກໍ່ເຫດ ພ້ອມຈູດໄຟເຜົາລົດຍົນຫຼາຍສິບຄັນ ເຮັດໃຫ້ມີຜູ້ເສຍຊີວິດ 3 ຄົນ ແລະ ໄດ້ຮັບບາດເຈັບ 1 ຄົນ ຂະນະທີ່ເຈົ້າໜ້າທີ່ຕຳຫຼວດໄດ້ໃຊ້ເວລາຫຼາຍຊົ່ວໂມງເພື່ອຊ່ວຍເກ້ຍກ່ອມໃຫ້ກຸ່ມໂຈນຍອມປ່ອຍຕົວປະກັນ ໃນທີ່ສຸດເຈົ້າໜ້າທີ່ກໍສາມາດຊ່ວຍເຫຼືອຕົວປະກັນພ້ອມຈັບກຸມກຸ່ມກໍ່ເຫດຄັ້ງນີ້ໄດ້.
ຢ່າງໃດກໍຕາມ, ໂຮງຮຽນຫຼາຍແຫ່ງພາຍໃນເມືອງໄດ້ຖືກສັ່ງປິດ ແລະ ທາງເຈົ້າໜ້າທີ່ກໍໄດ້ເຕືອນປະຊາຊົນໃຫ້ອາໄສຢູ່ແຕ່ບ້ານເຮືອນຂອງໃຜລາວຈົນກວ່າຈະສາມາດເກັບກູ້ລະເບີດທັງໝົດໄດ້.