ຍ້ອນການແຜ່ລະບາດຂອງໂຄວິດ-19 ໃນຊຸມຊົນຂອງລາວຍັງມີຄວາມສ່ຽງສູງ ທັງຈັດຢູ່ໃນລະດັບການລະບາດຮ້າຍແຮງຂັ້ນ 1, ນາຍົກລັດຖະມົນຕີຈິ່ງໄດ້ອອກແຈ້ງການວ່າດ້ວຍ ສືບຕໍ່ປະຕິບັດມາດຕະການ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19.
ມາດຕະການໃນການຈັດຕັ້ງປະຕິບັດເພື່ອຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໃນປະເທດ ໄດ້ແກ່: ສຸມໃສ່ການສັກວັກຊີນໃຫ້ບັນດາເປົ້າໝາຍຕ່າງໆ, ທັງສືບຕໍ່ປິດດ່ານສາກົນ, ດ່ານທ້ອງຖິ່ນ ແລະດ່ານປະເພນີ ຍົກເວັ້ນລົດຂົນສົ່ງສິນຄ້າ ແລະຜູ້ທີ່ໄດ້ຮັບອະນຸຍາດຈາກຄະນະສະເພາະກິດຂັ້ນສູນກາງ. ພ້ອມກັນນັ້ນ, ກໍສືບຕໍ່ປິດກິດຈະກຳຮ້ານບັນເທີງຕ່າງໆ, ໂຮງສາຍຮູບເງົາ, ອິນເຕີເນັດຄາເຟ່, ຮ້ານສະໜຸກເກີ້, ສວນອາຫານ, ຮ້ານນວດ, ສະປາ ແລະສະຖານທີ່ອື່ນໆທີ່ມີການສຳຜັດໃກ້ຊິດກັນເປັນຈຳນວນຫຼາຍ, ສຳລັບເຂດລະບາດຊຸມຊົນແມ່ນໃຫ້ເລື່ອນການເປີດສົກຮຽນໃນທຸກຊັ້ນຮຽນ ສາມາດເປີດໄດ້ສະເພາະທີ່ບໍ່ແມ່ນເຂດແດງ ພ້ອມປິດການສັນຈອນໃນນະຄອນຫຼວງວຽງຈັນນັບແຕ່ເວລາ 22:00 ໂມງ ຫາ 5:00 ໂມງເຊົ້າ.
ສືບຕໍ່ອະນຸຍາດໃຫ້ເປີດຮ້ານຄ້າຕ່າງໆ ລວມທັງຮ້ານຕັດຜົມ ແລະ ເສີມຄວາມງາມ ແຕ່ບໍລິການສະເພາະຕັດແຕ່ງຊົງຜົມເທົ່ານັ້ນ, ທັງອະນຸຍາດໃຫ້ເປີດຮ້ານອາຫານ, ໂຮງຈັກໂຮງງານມ ນຳໃຊ້ເຮືອຫາປາ, ເດີນທາງພາຍໃນປະເທດ ແລະອື່ນໆ ແຕ່ຕ້ອງປະຕິບັດຕາມມາດຕະການປ້ອງກັນພະຍາດໂຄວິດ-19 ທີ່ທາງຄະນະສະເພາະກິດວາງອອກຢ່າງເຄັ່ງຄັດ.
ມາດຕະການດັ່ງກ່າວເລີ່ມມີການຈັດຕັ້ງປະຕິບັດນັບແຕ່ວັນທີ 1 ກັນຍາ ເຖິງ 15 ກັນຍາ 2021
