ເວັບໄຊ້ Khaosod ໄດ້ລາຍງານວ່າ ໃນກາງຄືນວັນທີ 30 ສິງຫາ 2021 ທີ່ຜ່ານມາທາງການຂອງສະຫະລັດອາເມລິກາໄດ້ປະກາດສິ້ນສຸດການປະຕິບັດການທາງການທະຫານທີ່ດົນທີ່ສຸດເຖິງ 20 ປີ ໃນອັພການິດສະຖານຢ່າງເປັນທາງການ ຫຼັງຈາກທີ່ອົບພະຍົບທະຫານກຸ່ມສຸດທ້າຍອອກຈາກກຸງຄາບູ ພາຍໃຕ້ຂໍ້ຕົກລົງທີ່ໄດ້ເຮັດໄວ້ກັບກຸ່ມຕາລີບັນ.
ເຄື່ອງບິນລໍາລຽງ C17 ຖ້ຽວບິນສຸດທ້າຍຂອງກອງທັບສະຫະລັດໄດ້ນໍາທະຫານອອກຈາກສະໜາມບິນນານາຊາດຮາມິດ ຄຣາໄຊ ກຸງຄາບູ ປະຈໍາອັພການິດສະຖານ ໃນເວລາ 23:59 ໂມງ ເຊິ່ງຢູ່ພາຍໃຕ້ຂໍ້ກໍານົດທີ່ກຸ່ມຕາລີບັນໄດ້ກໍານົດໃຫ້ທາງສະຫະລັດຖອນກໍາລັງທະຫານອອກພາຍໃນວັນທີ 31 ສິງຫາ 2021, ຫຼັງຈາກທີ່ເຄື່ອງບິນຖ້ຽວສຸດທ້າຍຂອງອາເມລິກາໄດ້ບິນອອກຈາກອັພການິດສະຖານສະມາຊິກກຸ່ມຕາລີບັນກໍພາກັນຍິງປືນຂຶ້ນຟ້າເພື່ອສະເຫຼີມສະຫຼອງ.
ໃນໄລຍະເວລາເກືອບ 20 ປີຂອງການປະຕິບັດທາງການທະຫານໃນອັພການິດສະຖານໄດ້ເຮັດໃຫ້ທະຫານຂອງອາເມລິກາເສຍຊີວິດໄປທັງໝົດ 2.461 ຄົນ ແລະ ມີຫຼາຍກວ່າ 20,000 ຄົນ ໄດ້ຮັບບາດເຈັບ. ສະຫຼຸບແລ້ວການອົບພະຍົບອອກຈາກອັພການິດສະຖານແມ່ນໃຊ້ເວລາທັງໝົດ 18 ມື້ ໂດຍທາງສະຫະລັດສາມາດອົບພະຍົບທະຫານອອກໄດ້ຫຼາຍກວ່າ 123,000 ຄົນ ຫຼື ມື້ລະ 7,500 ຄົນ.