ພະແນກສຶກສາທິການ ແລະ ກິລາ ແຂວງຫຼວງພະບາງ ອອກແຈ້ງການ ໃຫ້ບັນດາໂຮງຮຽນອະນຸບານ, ໂຮງຮຽນປະຖົມສຶກສາ, ໂຮງຮຽນມັດທະຍົມສຶກສາ ທັງພາກລັດ ແລະ ເອກະຊົນ ທົ່ວແຂວງຫຼວງພະບາງ ໂຈະການເປີດສົກຮຽນໃໝ່ ໃນວັນທີ 1 ກັນຍາ 2021 (ສົກຮຽນ 2021-2022)

ຫົວໜ້າພະແນກສຶກສາທິການ ແລະກິລາ ແຂວງຫຼວງພະບາງ ຂໍຖືເປັນກຽດແຈ້ງການມາຍັງທ່ານ ພ້ອມກັນສືບຕໍ່ປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການແກ້ໄຂການລະບາດຂອງພະຍາດໂຄວິດ-19 ຢູ່ໃນຂະແໜງການສຶກສາ ແລະ ກີລາ ດັ່ງນີ້ :

1. ສໍາລັບການເປີດສົກຮຽນໃໝ່ ໃນວັນທີ 1 ກັນຍາ 2021 ໃນທຸກຊັ້ນ, ທຸກສາຍ ແລະ ທຸກຂັ້ນຮຽນ ທັງພາກລັດ ແລະ ເອກະຊົນ ແມ່ນໃຫ້ເລື່ອນໄປກ່ອນຈົນກວ່າຈະແຈ້ງການສະບັບໃໝ່.
2. ໃຫ້ຜູ້ບໍລິຫານ, ພະນັກງານ, ຄູ-ອາຈານ ສືບຕໍ່ໄປຮັບການສັກວັກຊິນກັນພະຍາດໂຄວິດ-19 ໃຫ້ຄົບຕາມລະບຽບການທີ່ໄດ້ກຳນົດ;
3. ບໍ່ອະນຸຍາດໃຫ້ຫ້ອງການສຶກສາທິການ ແລະ ກີລາເມືອງ/ນະຄອນ, ໂຮງຮຽນຈັດກອງປະຊຸມ, ສໍາມະນາ, ປາຖະກະຖາ, ຝຶກອົບຮົມວຽກງານການສຶກສາຕ່າງໆ;

4. ສໍາລັບໂຮງຮຽນກິນນອນຊົນເຜົ່ານໍ້າບາກ, ຊົນເຜົ່າສ່ວນຫຼາຍ, ມສ ເດັກກໍາພ້າ, ມສ ສັນຕິພາບ (ຫ້ອງພອນສະຫວັນ, ມສ ປອງຄຳ, ການສຶກສາພິເສດ ແລະ ໂຮງຮຽນແຫ່ງຕ່າງໆພາຍໃນແຂວງຫຼວງພະບາງ ທີ່ມີນັກຮຽນມາຈາກເມືອງ, ແຂວງທີ່ມີຄວາມສ່ຽງ ແມ່ນບໍ່ອະນຸຍາດໃຫ້ມາສະເໜີຕົວເທື່ອຈົນກວ່າຈະມີແຈ້ງການສະບັບໃໝ່.

5. ອະນຸຍາດໃຫ້ໂຮງຮຽນບໍ່ຢູ່ໃນເຂດແດງເປີດຮັບນັກຮຽນທີ່ມາສະເໜີຕົວ ແຕ່ຕ້ອງຮັກສາລະບຽບຂອງຄະນະສະເພາະກິດວາງອອກ.

6. ສໍາລັບການມາປະຈໍາການຂອງພະນັກງານ, ຄູ-ອາຈານ ໃນຂະແໜງການສຶກສາ ແລະ ກິລາ ໃຫ້ມາປະຈໍາການເປັນປົກກະຕິ, ໃຫ້ພາກັນປະຕິບັດຕໍ່ການສະກັດກັ້ນ ແລະ ປ້ອງກັນພະຍາດໂຄວິດ-19 ຢ່າງເຂັ້ມງວດ.