ເວັບໄຊ້ Khaosod ໄດ້ລາຍງານວ່າ ໃນວັນທີ 27 ສິງຫາ ທີ່ຜ່ານມາກະຊວງສາທາລະນະສຸກຂອງສິງກະໂປ ໄດ້ເລີ່ມສົ່ງເຄື່ອງກວດໂຄວິດ-19 ແບບພົກພາ ຊະນິດແອນຕິເຈນ ((Antigen Rapid Test) ) ໃຫ້ກັບທຸກຄົວເຮືອນຈໍານວນ 6 ອັນ/ຄອບຄົວ ຜ່ານທາງໄປສະນີ ໂດຍເລີ່ມຕັ້ງແຕ່ວັນທີ 28 ສິງຫາ ໄປຈົນຮອດວັນທີ 27 ກັນຍາ 2021 ເພື່ອເຮັດໃຫ້ປະຊາຊົນມີບົດບາດໃນການຈັດການກັບໂຣກລະບາດ ແລະ ປະເທດສິງກະໂປເອງກໍເປັນປະເທດທີ່ຄ່ອຍໆມີການຟື້ນໂຕຈາກໂຄວິດ-19.
ທາງດ້ານກະຊວງສາທາລະນະສຸກໄດ້ກ່າວໃນງານຖະແຫຼງການວ່າ “ສິ່ງສໍາຄັນຄືຕ້ອງໃຊ້ຄວາມຮັບຜິດຊອບສ່ວນໂຕໃນການທົດສອບຕົນເອງ ແລະ ຕິດຕາມສະຖານະສຸຂະພາບຂອງເຮົາເອງ”.
ສໍາລັບເຄື່ອງກວດໂຄວິດທີ່ທາງລັດຖະບານຈັດສົ່ງທາງໄປສະນີນັ້ນປະຊາຊົນທຸກຄົນສາມາດກວດສອບການຈັດສົ່ງໄດ້ຜ່ານທາງແອັບພິເຄຊັນຂອງໄປສະນີສິງກະໂປໂດຍກົງ ພ້ອມກັບຄູ່ມືການໃຊ້ງານ ແລະ ວິທີການຖິ້ມທີ່ເໝາະສົມຫຼັງຈາກທີ່ໃຊ້ງານແລ້ວ. ນອກຈາກນີ້, ລັດຖະບານສິງກະໂປຍັງກຽມສົ່ງເຄື່ອງກວດໂຄວິດ-19 ແບບພົກພາໃຫ້ກັບນັກຮຽນທີ່ຍັງບໍ່ສາມາດສັກວັກຊີນປ້ອງກັນໂຄວິດ-19 ໄດ້ ແລະ ຍັງຈະແຈກໃຫ້ກັບບຸກຄະລາກອນທີ່ຢູ່ພາຍໃນໂຮງຮຽນອີກດ້ວຍ.
ຢ່າງໃດກໍຕາມທາງກະຊວງສາທາລະນະສຸກໄດ້ກ່າວໃນວັນທີ 26 ສິງຫາທີ່ຜ່ານມາວ່າ 79% ຂອງປະຊາກອນສິງກະໂປແມ່ນໄດ້ຮັບວັກຊີນຄົບຖ້ວນແລ້ວ ແລະ ກໍາລັງດໍາເນີນການເພື່ອໃຫ້ບັນລຸເປົ້າໝາຍຂອງກະຊວງສາທາລະນະສຸກທີ 80% ພາຍໃນເດືອນສິງຫາ.