ເວັບໄຊ້ Khaosod ໄດ້ລາຍງານວ່າ ໃນວັນທີ 26 ສິງຫາ 2021 ທາງຕໍາຫຼວດໄດ້ປະກາດຖະແຫຼງຂ່າວການຈັບກຸມຜູ້ກໍາກັບໂຈ້ ທີ່ພາຍຫຼັງກໍ່ເຫດເຮັດໃຫ້ຜູ້ຕ້ອງຫາຄະດີຢາເສບຕິດເສຍຊີວິດ ເຊິ່ງໃນການຖະແຫຼງຂ່າວໃນຄັ້ງນີ້ ອະດີດຜູ້ກໍາກັບໂຈ້ ໄດ້ກ່າວຍອມຮັບຜິດ ພ້ອມກັບຂໍໂທດພໍ່ແມ່ປະຊາຊົນ ລວມໄປເຖິງຜູ້ບັນຊາການ ທີ່ເຮັດໃຫ້ອົງກອນຕໍາຫຼວດເສຍຊື່ສຽງ ແລະ ຄວາມຜິດໃນຄັ້ງນີ້ຂໍຍອມຮັບຜິດພຽງແຕ່ຄົນດຽວ ບໍ່ກ່ຽວກັບລູກນ້ອງ.
ນອກຈາກນັ້ນ, ຜູ້ກໍາກັບໂຈ້ຍັງໄດ້ກ່າວອີກວ່າ ຕົນເອງບໍ່ໄດ້ມີເຈດຕະນາທີ່ຈະເອົາຖົງດໍາມາຄຸມຫົວຜູ້ຕ້ອງຫາຈົນເສາຍຊີວິດ ພຽງແຕ່ຕ້ອງການຢາກຮູ້ຂໍ້ມູນເຄືອຂ່າຍລາຍໃຫຍ່ຂອງຄະດີຢາເສບຕິດເພີ່ມເຕີມ ແລະ ນີ້ເປັນຄັ້ງທໍາອິດທີ່ໃຊ້ວິທີດັ່ງກ່າວ ເນື່ອງຈາກບໍ່ຢາກໃຫ້ຜູ້ຕ້ອງຫາເຫັນໜ້າຂອງຕົນເອງ.
ຜູ້ກໍາກັບໂຈ້ຍອມຮັບວ່າຮູ້ສຶກຕົກໃຈຫຼາຍທີ່ເຫັນຜູ້ຕ້ອງຫາເສຍຊີວິດ ເນື່ອງຈາກຕອນເກີດເຫດຄິດວ່າຜູ້ຕ້ອງຫາພຽງແຕ່ເປັນລົມໄປເທົ່ານັ້ນ ແລະ ຍັງບອກວ່າຜູ້ຕ້ອງຫາມີການໃຊ້ຢາເສບຕິດໃນປະລິມານຫຼາຍໃນແຕ່ລະມື້ອາດເຮັດໃຫ້ເປັນສາເຫດຂອງການເສຍຊີວິດກໍເປັນໄດ້
ໃນຂະນະນີ້ຜູ້ກໍາກັບໂຈ້ໄດ້ຕິດຕໍ່ເຂົ້າມາຂໍມອບໂຕທີ່ແຂວງຊົນບູລີ ເພື່ອດໍາເນີນຄະດີຕາມຂັ້ນຕອນຕາມກົດໝາຍຕໍ່ໄປ