ການຫຼິ້ນການພະນັນປະເພດຕ່າງໆ ເຊັ່ນ: ການຫຼິ້ນໄພ້ ຕີໄກ່ ຕີສະນຸກເກີ ຫຼິ້ນເກມ ການລົງພະນັນທວາຍຜົນກີລາເຕະບານ
ລ້ວນແຕ່ເປັນສິ່ງທີ່ຜິດຕໍ່ລະບຽບກົດໝາຍ ເຊິ່ງຖ້າບຸກຄົນໃດຕິດການພະນັນ ນອກຈາກຈະເຮັດໃຫ້ຕົນເອງເສຍຊັບສິນແລ້ວ
ຍັງເຮັດໃຫ້ເປັນໜີ້ສິນຂອງຄົນອື່ນ ແລະ ເປັນສາເຫດໜຶ່ງທີ່ພາໃຫ້ເກີດມີປາກົດການຫຍໍ້ທໍ້ຕ່າງໆໃນສັງຄົມ ເຊັ່ນ: ຂີ້ລັກ-ງັດ
ແງະ ປຸ້ນຈີ້-ຊິງຊັບ ສໍ້ໂກງຊັບພົນລະເມືອງ ແລະ ອື່ນໆ ດັ່ງເຫດການຂອງທ້າວ ສຸລະໄຊ ຫຼື ຕຸ້ຍ ອາຍຸ 36 ປີ ຢູ່ບ້ານສາຍລົມ
ເມືອງຈັນທະບູລີ ນະຄອນຫຼວງວຽງຈັນ ທີ່ຕິດຫຼິ້ນການພະນັນ ຈົນເຮັດໃຫ້ຜູ້ກ່ຽວສໍ້ໂກງຊັບຂອງພົນລະເມືອງ ລວມເປັນເງິນ
ເກືອບ 3 ລ້ານບາດ.
ເຈົ້າໜ້າທີ່ ປກສ ເມືອງຈັນທະບູລີ ໃຫ້ຮູ້ວ່າ: ມີຜູ້ຖືກເສຍຫາຍຫຼາຍຄົນ ໄດ້ເຂົ້າມາແຈ້ງຄວາມຕໍ່ເຈົ້າໜ້າທີ່ກອງຄະດີອາຍາ
ປກສ ເມືອງຈັນທະບູລີ ໃນໄລຍະເດືອນສິງຫາ-ກັນຍາ 2014 ວ່າ: ທ້າວ ສຸລະໄຊ ໄດ້ມາສໍ້ໂກງເອົາຊັບສິນປະເພດລົດໃຫຍ່ໄປ
ຫຼາຍຄັນ ຈາກນັ້ນ ຈິ່ງໄດ້ປະສານສົມທົບກັບອຳນາດການປົກຄອງບ້ານສາຍລົມ ພ້ອມດ້ວຍພາກສ່ວນທີ່ກ່ຽວຂ້ອງ ຂຶ້ນບັນ
ຊີຕິດຕາມເປົ້າໝາຍ ແລະ ສາມາດກັກຕົວຜູ້ກະທຳຜິດ ມາດຳເນີນຄະດີໄດ້ໃນວັນທີ 27 ກັນຍາ 2014.
ຜ່ານການສອບສວນ ຜູ້ຖືກຫາຮັບສາລະພາບວ່າ: ໄດ້ໄປສໍ້ໂກງເອົາຊັບສິນຂອງພໍ່ແມ່ປະຊາຊົນແທ້ ເຊິ່ງສາເຫດທີ່ມີການກະ
ທຳຄືດັ່ງກ່າວ ແມ່ນຍ້ອນຕົນເອງຕິດຫຼິ້ນການພະນັນຢູ່ຄາຊີໂນພູເຂົາຄວາຍ ແລະ ຂົວມິດຕະພາບ ຈິ່ງຕ້ອງການເງິນໄປຫຼິ້ນ
ການພະນັນ ໂດຍໄດ້ໃຊ້ກົນອຸບາຍ ແລະ ຊ່ອງຫວ່າງທີ່ຕົນເອງເຮັດວຽກ ເປັນພະນັກງານຢູ່ບໍລິສັດທ່ອງທ່ຽວແຫ່ງໜຶ່ງ ຈິ່ງໄດ້
ໄປເຊົ່າລົດ ເພື່ອໄປຮັບແຂກໄປທ່ອງທ່ຽວ ແລະ ໃນເວລາທີ່ໄປເຊົ່າລົດນັ້ນ ຕົນເອງໄດ້ເອົາລົດທີ່ເຊົ່າມາໄປມັດຈຳເອົາເງິນນຳ
ບຸກຄົນອື່ນຈຳນວນ 10 ຄັນ ຄື: ມີລົດວິໂກ້ແຊມ 1 ຄັນ ລົດຕູ້ໂຕໂຢຕ້າ 1 ຄັນ ລົດເກັງ 3 ຄັນ ແລະ ລົດສະຕາແລັກ ຈຳນວນ
5 ຄັນ ລວມເປັນມູນຄ່າທີ່ເອົາມັດຈຳ ມີຈຳນວນ 2.800.000 ບາດ ປັດຈຸບັນ ເງິນຈຳນວນດັ່ງກ່າວ ແມ່ນຜູ້ກ່ຽວໃຊ້ຈ່າຍຫຼິ້ນ
ການພະນັນໝົດແລ້ວ ຕໍ່ກັບຄະດີລາຍນີ້ ຜູ້ຮັບມັດຈຳຈະຮ້ອງຟ້ອງຕາມຂະບວນຍຸຕິທຳ.
ແຫລ່ງຂ່າວ: ວຽງຈັນໃໝ່