ສຳນັກຂ່າວ Fox News ລາຍງານ: ກອງທັບອາກາດສະຫະລັດອາເມລິກາໄດ້ກວດພົບຊາກສົບຂອງມະນຸດຕິດຄ້າງຢູ່ໃນຫຼຸມລໍ້ຂອງເຮືອບິນ C-17 ທີ່ອອກເດີນທາງຈາກນະຄອນຫຼວງກາບູນ ຂອງອາຟການິດສະຖານ ໃນທ້າຍອາທິດຜ່ານມາ ແລະ ລາຍລະອຽດຕ່າງໆທີ່ຢູ່ອ້ອມຮອບເຮືອບິນລຳບິນດັ່ງກ່າວ ເຊິ່ງທາງເຈົ້າໜ້າທີ່ໄດ້ດຳເນີນການກວດສອບເພີ່ມເຕີມຂະນະລົງຈອດຢູ່ຖານທັບອາກາດ Al Udeid, ປະເທດກາຕ້າ ໃນວັນທີ 17 ສິງຫາ.

ເຈົ້າໜ້າທີ່ກອງທັບອາກາດກ່າວວ່າ: ເຮືອບິນ C-17 ລົງຈອດທີ່ສະໜາມບິນສາກົນກາບູນໃນມື້ວັນທິດຜ່ານມາ ເພື່ອສົ່ງມອບອຸປະກອນ ແລະ ຊ່ວຍອົບພະຍົບພົນລະເມືອງອາເມລິກາ ແລະ ພັນທະມິດໄປຍັງເຂດປອດໄພ ແຕ່ເຮືອບິນລຳດັ່ງກ່າວໄດ້ຖືກອ້ອມຮອບດ້ວຍຝູງຊົນຊາວອາຟການິດສະຖານຫຼາຍຮ້ອຍຄົນ ສະນັ້ນລູກເຮືອຈິ່ງຕັດສິນໃຈພາເຄື່ອງບິນອອກຈາກເຂດດັ່ງກ່າວໂດຍໄວ.

ພາບຖ່າຍຈາກໂທລະສັບມືຖືລວມທັງວີດີໂອທີ່ບັນທຶກພາບໃນສະໜາມບິນກາບູນ ໄດ້ສະແດງໃຫ້ເຫັນສະພາບຄວາມວຸ້ນວາຍ ເນື່ອງຈາກຊາວອາຟການິດສະຖານຫຼາຍຮ້ອຍຄົນພະຍາຍາມເກາະຕິດໄປກັບເຮືອບິນ ພ້ອມຍັງມີພາບວັດຖຸບາງຢ່າງຕົກລົງມາພາຍຫຼັງເຮືອບິນໄດ້ທະຍານອອກຈາກຣັນເວຍ໌ ເຊິ່ງຜູ້ຄົນສ່ວນໃຫຍ່ເຊື່ອວ່າແມ່ນສົບຂອງຄົນອາຟການິດສະຖານ.