ສຳນັກຂ່າວ Khmer Times ລາຍງານ: ກາຍເປັນທີ່ຮືຮາສຳລັບຊາວພະນົມເປັນ ເມື່ອສິງໂຕໜຶ່ງອອກມາຍ່າງຕາມຖະໜົນ 306 ໃຈກາງເມືອງຫຼວງຂອງປະເທດກຳປູເຈຍໃນຊ່ວງຕອນເຊົ້າຂອງວັນທີ 16 ສິງຫາຜ່ານມາ ກ່ອນທີ່ຜູ້ເປັນເຈົ້າຂອງຈະນຳຫາມັນຈົນພົບພ້ອມພາກັບບ່ອນພັກ.
ຂະນະທີ່ມີຄົນຖ່າຍຮູບແລ້ວໂພສລົງໂຊຊຽວມີເດຍພ້ອມໃຫ້ແຄັບຊັ່ນວ່າ “ນີ້ຄືເຫດຜົນທີ່ພວກເຮົາບໍ່ຄວນລ້ຽງສິງໂຕຢູ່ໃນເມືອງໃຫຍ່, ເບິ່ງແມ! ມັນກຳລັງອອກມາສຳຫຼວດຖະໜົນກາງເມືອງ”. ຢ່າງໃດກໍຕາມ, ບໍ່ມີການລາຍງານວ່າສິງໂຕນີ້ໄດ້ທຳຮ້າຍຜູ້ຄົນ ຫຼື ສັດລ້ຽງອື່ນໆແຕ່ຢ່າງໃດ.
ສິງໂຕນີ້ຊື່ວ່າ “ດັກມາຍ” (Dark Mind) ເຄີຍກາຍເປັນປະເດັນໂຕ້ຖຽງກັນເລື່ອງການລ້ຽງດູລະຫວ່າງຜູ້ເປັນເຈົ້າຂອງກັບເຈົ້າໜ້າທີ່ສູນອະນຸຮັກສັດປ່າໃນພະນົມເປັນ ໃນຊ່ວງເດືອນມິຖຸນາຜ່ານມາ ກ່ອນຈະຖືກຕັດສິນໃຫ້ນໍາເອົາສິງໂຕນີ້ຄືນສູ່ເຈົ້າຂອງເດີມອີກຄັ້ງ ແຕ່ຢູ່ພາຍໃຕ້ເງື່ອນໄຂສຳຄັນທີ່ຜູ້ເປັນເຈົ້າຂອງສັດລ້ຽງຈະຕ້ອງໄດ້ປະຕິບັດຢ່າງເຄັ່ງຄັດ ໂດຍສະເພາະກໍແມ່ນວິທີການລ້ຽງດູ, ມາດຖານທາງເຕັກນິກຂອງສະພາບແວດລ້ອມທີ່ຢູ່ອາໄສສຳລັບສິງໂຕ ແລະ ຄວາມປອດໄພ ເຊິ່ງຜູ້ເປັນເຈົ້າຂອງຈະຕ້ອງຮັບຜິດຊອບທຸກຄວາມສ່ຽງທີ່ເກີດຂຶ້ນທັງໝົດ.