ຈາກເຫດການທີ່ມີຜູ້ໃຊ້ເຟສບຸກທ່ານໜຶ່ງ ໄດ້ໂພສວິດີໂອ ພ້ອມຂໍ້ຄວາມເລົ່າເຖິງເຫດການ ຕອນເຊົ້າເວລາ ປະມານ 08:00 ວັນທີ 25/10/2014 ເກີດອຸບັດຕິເຫດລົດໃຫຍ່ ຍີ່ຫໍ້ໂຕໂຍຕ້າ ປຣາໂດ ສີດຳ ໝາຍເລກທະບຽນ ປກສ 0569 ຕຳກັບລົດຈັກ ແຖວໂຮງໝໍເສດຖາ, ນະຄອນຫຼວງວຽງຈັນ. ພາຍຫຼັງເກີດເຫດ ແລ້ວ ລົດໃຫຍ່ບໍ່ຍອມຈອດ ຂີ່ໜີເລີຍ, ຜູ້ເຫັນເຫດການຂີ່ລົດໄລ່ຕາມ ບີບແກສັນຍານໃຫ້ຈອດກໍ່ບໍ່ຈອດ.
ເຫດການດັ່ງກ່າວເຮັດໃຫ້ຜູ້ຂີ່ລົດຈັກ ໄດ້ຮັບບາດເຈັບ ແລະ ລົດເປເພ. ຮຽກຮ້ອງໃຫ້ ເຈົ້າຂອງລົດໃຫຍ່ຄັນດັ່ງກ່າວ ຊ່ວຍຮັບຜິດຊອບ ແລະ ເບິ່ງລົດຈັກດ້ວຍ.
ພາຍຫຼັງທີ່ວິດີໂອເລື່ອງດັ່ງກ່າວໄດ້ຖືກ ເຜີຍແຜ່ສູ່ສັງຄົມອອນລາຍນ໌ ໄດ້ເັຮດໃຫ້ຜູ້ຄົນໃນສັງຄົມອອນລາຍນ໌ ໄດ້ເຂົ້າມາສະແດງຄຳຄິດເຫັນໄປຕ່າງໆ ນານາ ບ້າງກໍວ່າ ລົດໃຫຍ່ອາດຈະບໍ່ຮູ້ວ່າຕົນເອງຂັບລົດຕຳລົດຈັກ, ບ້າງກໍຍັງບໍ່ເຊື່ອວ່າລົດຄັນດັ່ງກ່າວຕຳແລ້ວໜີ ເພາະເບິ່ງປ້າຍກໍແມ່ນພາກສ່ວນຮັກສາກົດໝາຍຢູ່ແລ້ວ ແລະບ້າງກໍວ່າອາດຈະເປັນລົດໂຈນຄ້າຂາຍຂອງຜິດກົດໝາຍທີ່ໃຊ້ປ້າຍ ປກສ ປອມເພື່ອຕົບຕາເຈົ້າໜ້າທີ່ ຫຼີກລ້ຽງການກວດກາ.
ແນວໃດກໍຕາມ ສັງຄົມກໍໄດ້ສະແດງຄວາມຮູ້ສຶກ ບໍ່ຄ່ອຍດີກັບເຫດການທີ່ເກີດຂຶ້ນ ແລະຮຽກຮ້ອງໃຫ້ເຈົ້າໜ້າທີ່ຈົ່ງຮີບດຳເນີນການ ສືບສວນສອບສວນຫາຕົ້ນປາຍສາເຫດ ໃຫ້ກະຈ່າງແຈ້ງ ທັງຕ້ອງໄດ້ຮັບຄວາມເປັນທຳຕໍ່ທັງສອງຝ່າຍ ຄືຜູ້ໄດ້ຮັບບາດເຈັບ ແລະເຈົ້າຂອງລົດທີ່ຕ້ອງສົງໄສ.
ຂອບໃຈພາບແລະຂ່າວ: ຈາກພົນລະເມືອງດີ