ເວັບໄຊ້ Thairath ໄດ້ລາຍງານວ່າໃນວັນທີ 28 ກໍລະກົດ 2021 ກຸ່ມເຍົາວະຊົນຂອງໄທ ຫຼື Free YPUTH ທີ່ນໍາໂດຍ ທ້າວ ທັດເທບ ເຣືອງປະໄພກິດເສຣີ ແລະ ທ້າວ ພານຸມາດ ສິງພົມ ໄດ້ໂພສຂໍ້ຄວາມລົງທາງເຟສບຸກເພື່ອປະກາດນັດການຊຸມນຸມຄັ້ງໃໝ່ ເຊິ່ງມີເນື້ອໃນວ່າ: “ຕ້ອງສູນເສຍຊີວິດຂອງປະຊາຊົນອີກຫຼາຍເທົ່າໃດ ທຸກຄົນຈຶ່ງຈະຮູ້ໄດ້ວ່າເວລາຂອງທ່ານປະຍຸດໄດ້ໝົດລົງແລ້ວ”.
ໃນເວລານີ້ປະເທດຊາດຕ້ອງການນາຍົກທີ່ຍຶດຖືຜົນປະໂຫຍດຂອງປະຊາຊົນເປັນທີ່ຕັ້ງ. ທາງທີມນັກຂ່າວໄດ້ລາຍງານວ່າ ທັນທີ່ທີ່ກຸ່ມເຍົາວະຊົນປະກາດນັດການຈັດຕັ້ງການຊຸມນຸມກໍປາກົດວ່າ ຫົວໜ້າຄົນສໍາຄັນຂອງກຸ່ມເຍົາວະຊົນດັ່ງກ່າວກໍໄດ້ໂພສຂໍ້ຄວາມລົງເຟສບຸກເພື່ອບອກໃຫ້ຜູ້ທີ່ຈະເຂົ້າຮ່ວມຊຸມນຸມກຽມພ້ອມໃຫ້ດີກວ່າເກົ່າ.
ທັງນີ້ກຸ່ມເຍົາວະຊົນໄດ້ມີການນັດຊຸມນຸມກັນຄັ້ງລ່າສຸດໃນວັນທີ 18 ກໍລະກົດ 2021 ທີ່ຜ່ານມາ ເຊິ່ງເປັນມື້ຄົບຮອບໜຶ່ງປີຂອງການນັດຊຸມນຸມຄັ້ງທໍາອິດ ແລະ ໃນຂະນະທີ່ກໍາລັງມີການເຄື່ອນການຊຸມນຸມໄປທີ່ສໍານັກງານນາຍົກກໍໄດ້ຖືກເຈົ້າໜ້າທີ່ຕໍາຫຼວດສະຫຼາຍການຊຸມນຸມດ້ວຍລູກປືນຢາງ ແລະ ກາສນໍ້າຕາຈົນຕ້ອງມີການຢຸດການຊຸມນຸມ.