ສຳນັກຂ່າວສົດອອນໄລນ໌ລາຍງານວ່າ: ທາງການຟີລິບປິນຈະມີການສະກັດກັ້ນບໍ່ໃຫ້ບຸກຄົນທີ່ເດີນທາງຈາກປະເທດໄທ ແລະ ມາເລເຊຍ ເຂົ້າປະເທດເປັນການຊົ່ວຄາວ ເພື່ອປ້ອງກັນການແຜ່ລະບາດຂອງໄວຣັສໂຄໂຣນ່າສາຍພັນເດລຕ້າ ເຊິ່ງຈັດເປັນໜຶ່ງສາຍພັນທີ່ຕິດຕໍ່ກັນໄດ້ງ່າຍທີ່ສຸດ.

ທ່ານ ແຮຣີ ໂຣກ, ໂຄສົກປະທານາທິບໍດີຟີລິບປິນກ່າວວ່າ: ຈຸດປະສົງຂອງການອອກມາດຕະການຈຳກັດການເດີນທາງນີ້ ກໍເພື່ອປ້ອງກັນບໍ່ໃຫ້ສາຍພັນຕ່າງໆຂອງເຊື້ອໂຄວິດ-19 ແຜ່ລະບາດໃນຊຸມຊົນຂອງຟີລິບປິນຫຼາຍຂຶ້ນ, ໂດຍມີການຈັດຕັ້ງປະຕິບັດມາດຕະການຊົ່ວຄາວດັ່ງກ່າວນັບແຕ່ວັນທີ 25 ກໍລະກົດຈົນຮອດທ້າຍເດືອນ.

ກ່ອນໜ້ານີ້, ທາງການຟີລິບປິນກໍເຄີຍອອກມາດຕະການຫ້າມບໍ່ໃຫ້ບຸກຄົນຈາກ 8 ປະເທດເດີນທາງເຂົ້າຟີລິບປິນ ເຊັ່ນ ອິນໂດເນເຊຍ, ອິນເດຍ, ປາກິສຖານ, ບັງກະລາເດດ, ສີລັງກາ, ເນປານ, ສະຫະລັດອາຫຼັບເອມີເຣດ ແລະ ໂອມານ ຂະນະທີ່ລັດຖະບານຟີລິບປິນກໍໄດ້ຍົກລະດັບມາດຕະການທີ່ເຂັ້ມງວດຂຶ້ນເພື່ອສະກັດກັ້ນການແຜ່ລະບາດຂອງພະຍາດໂຄວິດ ໃນນະຄອນຫຼວງມະນີລາ ແລະ ອີກ 4 ແຂວງ ທັງຫ້າມບໍ່ໃຫ້ເດັກທີ່ມີອາຍຸລະຫວ່າງ 5-17 ປີອອກຈາກເຮືອນນຳອີກ.