ສຳນັກຂ່າວຣອຍເຕີໃນກຸງລອນດອນລາຍງານການສຶກສາພົບວ່າ ຜູ້ໄດ້ຮັບວັກຊີນໄຟເຊີຄົບສອງໂດສ ມີປະສິດທິພາບໃນການປ້ອງກັນສາຍພັນເດວຕ້າໄດ້ເຖິງ 88%, ຂະນະທີ່ແອສຕຣາເຊເນກ້າສອງໂດສ ມີປະສິດທິພາບໃນການປ້ອງກັນສາຍພັນອັນຕະລາຍນີ້ໄດ້ 67%.

ຜູ້ຊ່ຽວຊານໜ່ວຍງານສາທາລະນະສຸກອັງກິດ (PHE) ກ່າວວ່າ: ການສີດວັກຊີນປ້ອງກັນໂຄວິດ-19 ຂອງໄຟເຊີໂດສທີໜຶ່ງມີປະສິດທິພາບ 36% ແລະ ແອສຕຣາເຊເນກ້າໜຶ່ງໂດສ ມີປະສິດທິພາບປະມານ 30%, ຂະນະທີ່ກ່ອນໜ້ານີ້ PHE ໄດ້ລາຍງານວ່າ ວັກຊີນເຂັມທຳອິດຂອງສອງຊະນິດນີ້ ມີປະສິດທິພາບປະມານ 33% ຕໍ່ໂລກຕາມອາການຈາກສາຍພັນເດວຕ້າ.

ຢ່າງໃດກໍຕາມ, ວັກຊີນດັ່ງກ່າວແມ່ນມີປະສິດທິພາບສູງເມື່ອທຽບກັບສາຍພັນເດວຕ້າ ເຊິ່ງປັດຈຸບັນໄດ້ກາຍເປັນສາຍພັນອັນຕະລາຍອັນດັບຕົ້ນຂອງໂລກ ແຕ່ການສີດວັກຊີນ ພຽງໜຶ່ງໂດສແມ່ນບໍ່ສາມາດຊ່ວຍໃນການປ້ອງກັນການຕິດເຊື້ອໂຄວິດໄດ້.