ຈາກການລາຍງານຂ່າວ Posttoday ໄດ້ລາຍງານວ່າ ທີມນັກວິທະຍາສາດຂອງປະເທດອົດສະຕາລີໄດ້ໃຊ້ເທັກໂນໂລຊີ CRISPR ເພື່ອຕັດຕໍ່ພັນທຸກໍາໃນການສະກັດກັ້ນການແຜ່ກະຈາຍຂອງເຊື້ອໂຄວິດ-19 (SARS-CoV-2) ໃນຈຸລັງຂອງມະນຸດທີ່ຕິດເຊື້ອໄດ້ສໍາເລັດຖືເປັນອີກຂັ້ນໜຶ່ງທີ່ຈະນໍາໄປສູ່ການຜະລິດຢາປິ່ນປົວໂຄວິດ-19.
ບົດລາຍງານການວິໄຈໃນຄັ້ງນີ້ຖືກຕີພິມໃນວາລະສານ Nature Communications ໂດຍມີເນື້ອໃນລະບຸວ່າ ເທັກໂນໂລຊີດັ່ງກ່າວມີປະສິດທິພາບກັບການກະຈາຍຂອງເຊື້ອໄວຣັສໃນການທົດລອງໃຫ້ຫ້ອງປະຕິບັດການ ແລະ ຄາດວ່າຈະເລີ່ມທົດລອງໃນສັດໃນໄວໆນີ້.
ທີມວິໄຈ CRISPR-Cas13b ທ່ານ ຊາຣອນ ລູວິນ ຜູ້ວິໄຈອາວຸໂສຈາກສະຖາບັນເພື່ອການວິໄຈໂລກຕິດເຊື້ອ ແລະ ພູມຄຸ້ມກັນຂອງອົດສະຕາລີໄດ້ເປີດເຜີຍວ່າທາງທີມງານໄດ້ອອກແບບໃຫ້ CRISPR ສາມາດຈື່ເຊື້ອໄວຣັສໂຄໂລນາໄດ້ ແລະ ເມື່ອສາມາດຈົດຈໍາເຊື້ອໄວຣັສໄດ້ແລ້ວ CRISPR-Cas13b ກໍຈະເຂົ້າໄປທໍາລາຍເຊື້ອໄວຣັສດັ່ງກ່າວ.
ນອກຈາກນີ້, ເທັກໂນໂລຊີຕັດຕໍ່ພັນທຸກໍານີ້ແມ່ນສະກັດບໍ່ໃຫ້ໄວຣັສແບ່ງຕົວ ເຖິງຢ່າງໃດກໍຕາມ ທ່ານ ລູວິນໄດ້ເປີດເຜີຍຕື່ມອີກວ່າ ການນໍາເທັກໂນໂລຊີແບບ CRISPR ມາໃຊ້ກັບຢາທີ່ມີຢູ່ທົ່ວໄປອາດຕ້ອງໃຊ້ເວລາອີກຫຼາຍປີ ແຕ່ເຖິງຢ່າງນັ້ນວິທີດັ່ງກ່າວກໍມີປະໂຫຍດໃນການຈັດການກັບໂຄວິດ-19.
ທ່ານ ລູວິນຍັງໄດ້ບອກອີກວ່າ ຢາປິ່ນປົວນີ້ຈະເປັນຢາຕ້ານໄວຣັສແບບງ່າຍໆໂດຍການກິນ ເຊິ່ງຜູ້ຕິດເຊື້ອສາມາດກິນໄດ້ທັນທີ ທີ່ຮູ້ວ່າຕົນເອງຕິດເຊື້ອ ເພື່ອປ້ອງກັນບໍ່ໃຫ້ມີອາການທີ່ຮຸນແຮງ ແລະ ຫຼຸດຜ່ອນຄວາມກົດດັນໃຫ້ກັບໂຮງໝໍ ແລະ ລະບົບສາທາລະນະສຸກ. ທັງນີ້, ເທັກໂນໂລຊີ CRISPR ຊ່ວຍໃຫ້ນັກວິທະຍາສາດສາມາດປັບປ່ຽນລໍາດັບ DNA ແລະ ປ່ຽນແປງການເຮັດວຽກຂອງພັນທຸກໍາທີ່ເຄີຍປະສົບຜົນສໍາເລັດມາແລ້ວໃນການຖອດລະຫັດພັນທຸກໍາທີ່ເຮັດໃຫ້ເກີດມະເຮັງໃນເດັກນ້ອຍ.