ລັດຖະບານໄດ້ກ່າວເນັ້ນໃຫ້ພາກສ່ວນກ່ຽວຂ້ອງເພີ່ມທະວີຄວາມເຂັ້ມງວດໃນການປ້ອງກັນການລັກລອບເດີນທາງເຂົ້າປະເທດທີ່ອາດເກີດຂຶ້ນ ທັງທາງບົກ ແລະ ທາງນໍ້າ ເພື່ອສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19.
ກອງປະຊຸມເປີດກວ້າງ ຄັ້ງທີ 1 ປີ 2021 ຂອງລັດຖະບານ ຊຸດ IX ທີ່ຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງວັນທີ 6-8 ກໍລະກົດ 2021 ເຊິ່ງໄດ້ມີການສະຫຼຸບຕີລາຄາການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນໄລຍະ 6 ເດືອນຕົ້ນປີ 2021.
ອີງຕາມການປະເມີນສະພາບການລະບາດຂອງພະຍາດ COVID-19 ໃນປະຈຸບັນ, ເຖິງວ່າຕົວເລກການລະບາດຢູ່ພາຍໃນປະເທດສືບຕໍ່ຫຼຸດລົງ, ແຕ່ຍັງມີຄວາມສ່ຽງ ເນື່ອງຈາກສະພາບການລະບາດຢູ່ປະເທດໃກ້ຄຽງຍັງສືບຕໍ່ເພີ່ມຂື້ນ. ນອກຈາກນີ້ ຢູ່ປະເທດເຮົາ ໄດ້ກວດພົບການຕິດເຊື້ອສາຍພັນເດວຕາ ຈາກການນໍາເຂົ້າ ເຊິ່ງເປັນສາຍພັນທີ່ແຜ່ເຊື້ອໄວກວ່າສາຍພັນດັ້ງເດີມ.
ຄວາມຮຽກຮ້ອງຕ້ອງການໃນການເດີນທາງກັບຄືນສູ່ປະເທດຂອງບັນດາແຮງງານລາວຢູ່ຕ່າງປະເທດ ເຮັດໃຫ້ມີການກວດພົບຈຳນວນການຕິດເຊື້ອນຳເຂົ້າທີ່ເພີ່ມຂຶ້ນໃນແຕ່ລະວັນ ເຊິ່ງທາງພາກສ່ວນກ່ຽວຂ້ອງກໍໄດ້ສືບຕໍ່ເພີ່ມທະວີການລາດຕະເວນຕາມຊາຍແດນເພື່ອປ້ອງກັນບໍ່ໃຫ້ມີການລັກລອບເຂົ້າປະເທດ, ແນໃສ່ໃຫ້ມີການກັບຄືນປະເທດຕາມດ່ານຕ່າງໆທີ່ທາງລັດຖະບານກໍານົດ.
ໃນກອງປະຊຸມຍັງໄດ້ຮຽນຮ້ອງໃຫ້ສືບຕໍ່ເອົາໃຈໃສ່ແກ້ໄຂການແຜ່ລະບາດ ຂອງພະຍາດໂຄວິດ-19 ດ້ວຍຄວາມເຄັ່ງຮ້ອນ, ເຂັ້ມງວດ ແລະ ເດັດຂາດ; ຈັດຕັ້ງຜັນຂະຫຍາຍມາດຕະການຂອງລັດຖະບານ ແລະ ຄະນະສະເພາະກິດ ເຂົ້າສູ່ຂົງເຂດວຽກງານ ແລະ ທ້ອງຖິ່ນຂອງຕົນ ດ້ວຍຄວາມເປັນເຈົ້າການ ແລະ ຮັບຜິດຊອບສູງບົນຈິດໃຈປະດິດສ້າງ, ກ້າຄິດ, ກ້າເຮັດ ແລະ ກ້າຮັບຜິດຊອບ ເພື່ອຕັດວົງຈອນການແຜ່ລະບາດທຸກຮູບແບບຢ່າງແທດເໝາະ.
ຂໍ້ມູນຈາກ: Lao National Radio