ເດືອນມິຖຸນາຜ່ານມາ ມີຜູ້ເສຍຊີວິດຈາກອຸບັດເຫດທາງຖະໜົນ 37 ຄົນ ເຖິງແມ່ນຈຳນວນຜູ້ເສຍຊີວິດຈະຫຼຸດລົງເມື່ອທຽບກັບຊ່ວງຫຼາຍເດືອນກ່ອນ ເນື່ອງຈາກຫຼາຍແຂວງ ລວມທັງນະຄອນຫຼວງວຽງຈັນ ມີການປະຕິບັດມາດຕະການລັອກດາວເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19.
ອີງຕາມຂໍ້ມູນຈາກພະແນກໂຄສະນາ ຂອງກົມຕຳຫຼວດຈະລາຈອນຮູ້ວ່າ: ອຸບັດເຫດທີ່ເກີດຂຶ້ນໃນຊ່ວງເດືອນມິຖຸນາຜ່ານມາມີ 326 ລາຍ, ມີຜູ້ເສຍຊີວິດ 37 ຄົນ, ບາດເຈັບ 429 ຄົນ, ພາຫານະເປ່ເພ 563 ຄັນ, ລວມມູນຄ່າເສຍຫາຍ 4.7 ຕື້ກວ່າກີບ.
ຈຳນວນອຸບັດເຫດເຫັນວ່າເພີ່ມຂຶ້ນເມື່ອທຽບໃສ່ເດືອນພຶດສະພາ ທັງທີ່ເປັນຊ່ວງຂອງການລັອກດາວໃນບັນດາແຂວງຕ່າງໆ ລວມທັງນະຄອນຫຼວງວຽງຈັນ, ຂະນະທີ່ອຸບັດເຫດເກີດຂຶ້ນໃນເດືອນພຶດສະພາ 269 ລາຍ, ພາຫານະເປ່ເພ 460 ຄັນ, ມີຜູ້ໄດ້ຮັບບາດເຈັບ 421, ເສຍຊີວິດ 43 ຄົນ.
ສາເຫດຂອງການເກີດອຸບັດເຫດສ່ວນໃຫຍ່ແມ່ນຜູ້ຂັບຂີ່ໄວເກີນກຳນົດ, ຮອງລົງມາແມ່ນເມົາແລ້ວຂັບ, ປ່ຽນທິດທາງ, ລ່ວງປ້າຍຫ້າມ, ແຊງບໍ່ຮັບປະກັນ ແລະ ອື່ນໆ.
ສຳລັບວັນທີ່ເກີດອຸບັດເຫດສ່ວນໃຫຍ່ກໍແມ່ນວັນສຸກ, ເສົາ ແລະ ອາທິດ ເຊິ່ງກວມ 54% ຂອງຈຳນວນອຸບັດເຫດທີ່ເກີດຂຶ້ນທັງໝົດ ແລະ ເວລາຂອງການເກີດອຸບັດເຫດສ່ວນໃຫຍ່ແມ່ນ 5:00 ໂມງແລງ ເຖິງ 12:00 ໂມງກາງຄືນ.
ຢ່າງໃດກໍຕາມ, ແຂວງທີ່ເກີດອຸບັດເຫດຫຼາຍກວ່າໝູ່ໃນເດືອນມິຖຸນາແມ່ນ ຈຳປາສັກ, ຮອງລົງມາແມ່ນນະຄອນຫຼວງວຽງຈັນ ແລະ ແຂວງວຽງຈັນ, ຂະນະທີ່ຍອດຜູ້ເສຍຊີວິດສູງກວ່າໝູ່ຊໍ້າພັດແມ່ນນະຄອນຫຼວງວຽງຈັນລວມ 10 ຄົນ, ຮອງລົງມາແມ່ນຈຳປາສັກ ເສຍຊີວິດ 6 ຄົນ ແລະ ແຂວງວຽງຈັນເສຍຊີວິດ 5 ຄົນ.