ຍາດພີ່ນ້ອງຜູ້ປ່ວຍໂຄວິດ-19 ສຸດໂຫດ ຮ່ວມກັນລົງມືທຳຮ້າຍຮ່າງກາຍ ດຣ. ເສນາປະດີ ໜຶ່ງໃນທ່ານໝໍທີ່ປິ່ນປົວຜູ້ປ່ວຍພະຍາດໂຄວິດ ຈົນໄດ້ຮັບບາດເຈັບສາຫັດຫຼັງຄົນເຈັບເສຍຊີວິດໃນໂຮງໝໍທີ່ເມືອງ Hojai ໃນລັດອັສຊຳ, ພາກຕາເວັນອອກສ່ຽງເໜືອຂອງອິນເດຍ.
BBC News, Delhi ລາຍງານວ່າ: ສັງຄົມໂຊຊຽວໄດ້ແຊພາບວີດີໂອ ທີ່ສະແດງໃຫ້ເຫັນກຸ່ມຜູ້ຊາຍສ່ວນໃຫຍ່ກຳລັງພາກັນທຳຮ້າຍຮ່າງກາຍທ່ານໝໍຄົນໜຶ່ງຢ່າງໂຫດຫ້ຽມ ໄຮ້ມະນຸດສະທຳ ກ່ອນຈະລາກເອົາຮ່າງກາຍທ່ານໝໍຜູ້ບໍ່ມີທາງສູ້ອອກໄປຂ້າງນອກພ້ອມສືບຕໍ່ທຸບຕີຢ່າງໄຮ້ຄວາມປານີ.
ຂະນະທີ່ຄວາມປອດໄພໃນການປົກປ້ອງທ່ານໝໍຈາກການຖືກທຳຮ້າຍຮ່າງກາຍກໍມີຄວາມບົກຜ່ອງ ເພາະມີພະນັກງານຍາມພຽງຄົນດຽວ, ເມື່ອທ່ານໝໍຜູ້ຖືກເຄາະຮ້າຍຖືກຈູ່ໂຈມດ້ວຍອາລົມຂອງຍາດຜູ້ປ່ວຍ ກໍບໍ່ມີໃຜສາມາດເຂົ້າຊ່ວຍເຫຼືອ ເພາະເຈົ້າໜ້າທີ່ຈຳນວນໜຶ່ງກໍຖືກຝູງຊົນໂຈມຕີ ແລະ ອີກຈຳນວນໜຶ່ງກໍພາກັນລີ້ຊ້ອນເພື່ອເອົາຕົວລອດ.
ດຣ. ເສນາປະດີ ຮີບເຂົ້າແຈ້ງຄວາມກັບເຈົ້າໜ້າທີ່ຕຳຫຼວດພາຍຫຼັງພະຍາຍາມໜີອອກຈາກເງື້ອມມືຂອງຝູງຊົນໄດ້. ເນື່ອງຈາກວີດີໂອຖືກແຊຣ໌ອອກໄປຢ່າງວ່ອງໄວ ເຮັດໃຫ້ເກີດມີສຽງວິພາກວິຈານ ທາງເຈົ້າໜ້າທີ່ຂອງລັດກໍໄດ້ໃຫ້ຄຳໝັ້ນສັນຍາວ່າຈະຮີບຮ້ອນດຳເນີນຄະດີເພື່ອມອບຄວາມເປັນທຳໃຫ້ແກ່ທ່ານໝໍ, ເຊິ່ງໃນນັ້ນ 36 ຄົນ ແລະ ເດັກນ້ອຍ 3 ຄົນ ຖືກຕັ້ງຂໍ້ຫາເປັນຜູ້ກະທຳຜິດຖານທຳຮ້າຍຮ່າງກາຍບຸກຄົນອື່ນຈົນໄດ້ຮັບບາດເຈັບ.
ນີ້ບໍ່ແມ່ນຄັ້ງທຳອິດທີ່ທ່ານໝໍໃນອິນເດຍຖືກປະຊາຊົນໂຈມຕີ, ນັບແຕ່ເລີ່ມມີການແຜ່ລະບາດຂອງພະຍາດໂຄວິດ-19 ໃນອິນເດຍເມື່ອປີກາຍນີ້, ທ່ານໝໍຫຼາຍຄົນຖືກຄອບຄົວຜູ້ປ່ວຍໂຄວິດທຳຮ້າຍຮ່າງກາຍ ເຮັດໃຫ້ທ່ານໝໍຫຼາຍຄົນພາກັນລຸກຂຶ້ນປະທ້ວງ ເພື່ອຮຽກຮ້ອງໃຫ້ມີການປະຕິບັດກົດໝາຍທີ່ເຂັ້ມງວດຂຶ້ນ, ລວມທັງເພີ່ມຈຳນວນບຸກຄະລາກອນ ແລະ ໂຄງສ້າງພື້ນຖານທີ່ດີຂຶ້ນ ເພື່ອຫຼຸດຜ່ອນແຮງກົດດັນແກ່ບັນດາແພດໝໍທົ່ວປະເທດ.
ອິນເດຍມີອັດຕາສວ່ນຂອງຈຳນວນແພດຕໍ່ຜູ້ປ່ວຍທີ່ຕໍ່າສຸດໃນໂລກ, ໃນປີ 2018 ມີແພດ 90 ຄົນຕໍ່ປະຊາກອນ 100,000 ຄົນ, ຕາມການຄາດຄະເນຂອງທະນາຄານໂລກເຫັນວ່າຕໍ່າກວ່າຫຼາຍປະເທດເຊັ່ນ ຈີນ, ສະຫະລັດອາເມລິກາ ແລະ ຣັດເຊຍ.